Governu Timor-Leste

Governu Konstitusionál IX Timor-Leste nian hetan onra hodi organiza “Desfile Oseanu Dili” dahuluk, ne’ebé lidera hosi Governu, hodi selebra marku istóriku ida ba rejiaun Sudeste Aziátiku. Selebrasaun ksolok-tebes ida-ne'e sai hanesan destake ida hosi Semana Mundiál Oseanu Timor-Leste tinan 2025 nian, ne'ebé maka hala'o hosi loron 1 to'o loron 8 fulan-juñu. 

Desfile ne’e hala’o iha sábadu, loron 7 fulan-juñu, no transforma tasi-ibun Dili nian sai selebrasaun “Tasi Azul”. Desfile ne’e hahú iha Ministériu Negósius Estranjeirus no Kooperasaun nia oin no la’o tuir área tasi-ibun ne’ebé ksolok-tebes to’o iha portu Dili, distánsia badak hosi Palásiu Governu. Eventu ne’e ofisialmente loke husi Prezidente Repúblika, José Ramos-Horta, Primeiru-Ministru Kay Rala Xanana Gusmão no Vise-Primeiru-Ministru Francisco Kalbuadi Lay, ne’ebé hala’o mós kna’ar nu’udar Ministru Koordenadór Asuntus Ekonómikus no Ministru Turizmu no Ambiente. 

Desfile ne'e organiza hosi Ministériu Turizmu no Ambiente, ho apoiu hosi Gabinete Fronteiras Terrestres no Marítimas (GFTM), no atrai partisipante rihun-ba-rihun hosi Dili, no mós reprezentante sira hosi munisípiu oioin. Partisipante sira mai husi ajénsia governu nian, parseiru dezenvolvimentu, ONG, grupu komunidade, munisípiu, instituisaun ensinu no membru setór privadu sira. Hatais roupa sira ho tema kór tasi nian, ema-lubun ne'e halo desfile ho karreta enfeitada sira, hodi habelar mensajen ksolok-tebes ida ne'ebé selebra maravilla sira tasi nian no husu atu prezerva no proteje tasi ba jerasaun sira iha futuru. 

Hala’o durante Semana Mundiál Oseanu 2025 nian, Desfile Oseanu Dili nian serve hodi selebra Timor-Leste nia ligasaun forte ho tasi no atu destaka kompromisu nasaun nian ba konservasaun tasi. Eventu ne’e ho objetivu atu hasa’e konsiénsia públiku kona-ba signifikadu hosi tasi no haburas orgullu nasionál, ho responsabilidade hamutuk hodi salvaguarda rekursus tasi nian, promove jestaun tasi ne’ebé sustentável no avansa Timor-Leste nia vizaun kona-ba Ekonomia Azul. Iha tempu hanesan, eventu ne'e buka atu haruka mensajen ida ne'ebé maka'as ba komunidade globál no rejionál kona-ba nesesidade urjente atu hamutuk proteje ita-nia tasi.

Desfile ne’e konklui ho Festivál Gastronómiku Oseanu iha Portu Dili, hodi hatudu oportunidade barak ne’ebé oseanu oferese atu apoia no hadi’a kondisaun moris iha Timor-Leste. Iha mós divertimentu no aprezentasaun kulturál sira hosi grupu komunitáriu sira.

Governu Timor-Leste agradese ba dedikasaun no partisipasaun husi parte hotu-hotu ne’ebé involve hodi halo desfile oseanu dahuluk ne’e sai susesu boot ida.

(media GFMT)