Komisaun Funsaun Públika organiza workshop interministeriál kona-ba “Definisaun aprosimasaun estratéjia nian”
Komisaun Funsaun Públika (KFP) ho parseria UNMIT nian organiza workshop interministeriál ida iha UNMIT, Obrigadu Barak, iha loron 25 fulan Novembru. Workshop ida-ne’e ho objetivu atu defini aprosimasaun estratejia servisu sivíl iha Komisaun nian. Sorumutu ne’e loke hosi Presidente KFP, Libório Pereira, no akompaña hosi Komisáriu sira hanesan Komisáriu Alexandre Corte-Real no Komisária Jesuina Gomes.
Iha sorumutu ne’e hala’o mós diskusaun grupu nian ne’ebé lidera hosi asesór internasionál UNMIT, Alfonso Mekolo no fasilitadór grupu servisu nian hosi diretór nasionál sira KFP nian. Objetivu hosi debate ne’e atu identifika funsaun 3 ne’ebé sai hanesan prioridade ho nia métudu servisu no benefisiu hosi artigu 5º lei nº 7/2009 nian (Funsaun no Atribuisaun KFP nian). Hosi aprezentasaun grupu servisu nian, funsaun tolu ne’ebé sira hili mak kona-ba; rekrutamentu, avaliasaun dezenpeñu no kapasitasaun rekursu umanu.
Prezidente Komisaun Funsaun Públika iha ninia síntize finál hateten katak importante tebes kontinua dezenvolve sorumutu ida-ne’e tanba hosi ne'e mak Ministériu ka Sekretaria Estadu ida-idak bele aprezenta ninia observasaun kona-ba servisu ne’ebé sira hala’o no servisu KFP nian.
