Governu Timor-Leste

Ministru Transportes no Komunikasoins, Miguel Marques Gonçalves Manetelu, ohin, loron 10 fulan-juñu tinan 2025, partisipa iha gravasaun “Página do Governo” epizódiu ba da-12, ne’ebé iha tempu besik sei tranzmite husi Rádiu no Televizaun Timor-Leste (RTTL) no divulga iha media nasionál sira no iha rede sosiál sira. 

Durante entrevista, Ministru fahe informasaun sira kona-ba liñas prinsipais atuasaun Ministériu Transportes no Komunikasoins nian, hodi destaka prioridades, inisiativas ne’ebé la’o hela no dezafiu sira iha setór ne’e.  Konversa ne’e aborda tema oin-oin kona-ba dezenvolvimentu infraestruturas transporte nian, modernizasaun ba komunikasoins no esforsus Governu nian hodi promove mobilidade ida ne’ebé efisiente no segura liu iha territóriu nasionál tomak.

Governante ne’e destaka, entre sira seluk, progresus ne’ebé alkansa ona iha ezekusaun projetus estruturantes Ministériu nian, hanesan projetu reabilitasaun Aeroportu Internasionál Prezidente Nicolau Lobato no instalasaun kabu submarinu fibra ótika ne’ebé liga Timor-Leste ba Austrália, ho objetivu atu fornese internet ho velosidade aas. 

Entrevista ne’e inklui mós tema sira hanesan melloria ba mobilidade urbana, modernizasaun no expansaun sistema transportes públikus, no medidas ne’ebé prevee ona hodi reforsa fiskalizasaun, seguransa rodoviária no formasaun ba kondutores, liu-liu iha Dili. 

 “Página do Governo” nu’udar inisiativa ida ne’ebé promove husi Ministru Prezidénsia Konsellu Ministrus no Portavós Governu, Agio Pereira, iha parseria ho RTTL. Konta ho Nélia Chaves hanesan aprezentadora, Ika Moniz hanesan produtora ezekutiva no apoiu tékniku husi ekipa mídia sira hosi Gabinete Primeiru-Ministru, Gabinete Portavós no membru Governu entrevistadu. Programa ne’e ho objetivu atu reforsa transparénsia no prosimidade entre Ezekutivu no populasaun, hodi permite katak ema hotu akompaña, ho forma asesivel no informada, asaun prinsipál no polítika públika sira ne’ebé la’o hela.