Governu Timor-Leste

Sorumutu Ministeriál ba dala 15 entre Uniaun Europeia (UE) no País Afrikanu Lian Portugés no Timor-Leste (PALOP-TL) ne’e hala’o husi loron 4 to’o loron 6 fulan-juñu, iha Salaun Nobre Ministériu Negósius Estranjeirus no Kooperasaun, nu’udar enkontru multilaterál nivel altu ida ne’ebé ho objetivu atu hametin kooperasaun no konsolida parseria estratéjika sira ne’ebé orienta ba dezenvolvimentu institusionál, kulturál no ekonómiku nasaun partisipante sira nian.

Enkontru multilaterál nivel altu ne’e organiza husi Governu Timor-Leste, liuhosi Ministériu Negósius Estranjeirus no Kooperasaun. Sorumutu  ne’e halibur Ministrus Negósius Estranjeirus no Kooperasaun, Ministrus Finansas, no reprezentante importante sira seluk husi nasaun membrus Grupu PALOP-TL neen—Angola, Cabo Verde, Giné-Bisau, Mosambike, São Tomé e Principe no  Timor-Leste—no mós reprezentante sira husi Komisaun Europeia no Delegasoins UE nian iha nasaun sira grupu ne’e nian. Prezidénsia rotativa Grupu PALOP-TL daudaun ne’e asegura husi Giné-Bisau.

Programa husi sorumutu ne’e fahe ba momentu prinsipál rua: sorumutu tékniku ida, ne’ebé sei hala’o iha loron 4 no 5 fulan-juñu, ne’ebé dedika ba monitorizasaun projetu sira ne’ebé la’o hela – hanesan Pro PALOP-TL no Pro CULTURA I – no preparasaun inisiativa sira iha futuru, inklui Pro CULTURA II no Pro JUST; no sorumutu ministeriál, ne’ebé marka ona ba loron 6 fulan-juñu, ne’ebé sei foka ba reflesaun estratéjika kona-ba futuru parseria nian.

Sorumutu Ministeriál ba dala 15 ne’e sei permite partisipante sira atu fahe esperiénsia no halibur informasaun sira ne’ebé util hodi define abordajen estratéjika konjunta ida, ne’ebé foka liu ba projetu sira ne’ebé iha hela dezenvolvimentu no iha faze planeamentu iha ámbitu kooperasaun entre UE no PALOP-TL. Sei tau atensaun liu iha fortalesimentu institusionál no konkretizasaun ba inisiativa foun sira iha área kultura, justisa no governasaun. Sorumutu ne’e mós sei inklui reflesaun kona-ba dalan atu hakle’an parseria no hadi’a mekanizmus komunikasaun konjunta.

"Hanesan onra ida ba Timor-Leste hodi sai uma-na'in ba sorumutu altu nivel ida-ne'e ba dala rua, dezde ami-nia integrasaun iha Grupu PALOP-TL iha tinan 2007. Sorumutu ida-ne'e simboliza fortalesimentu hosi ita-nia parseria no rekoñesimentu husi ita-nia kompromisu ba prinsípius kooperasaun nian ne'ebé nasaun sira Grupu nian no Uniaun Europeia fahe", hatete Bendito dos Santos Freitas, Ministru Negósius Estranjeirus no Kooperasaun Timor-Leste.

Ministra Negósius Estranjeirus no Kooperasaun Mosambike, Verónica Macamo, atuál koordenadora Grupu ba Parseria ho UE, subliña katak "sorumutu ida-ne’e reafirma kompromisu PALOP-TL nian ba fortalesimentu institusionál no promosaun estratéjia konjunta sira. Parseria ho Uniaun Europeia sai fundamentál ba dezenvolvimentu sustentável hosi ita-nia nasaun sira, no sorumutu ida-ne’e nu’udar pasu importante ida atu konsolida ita-nia objetivu komún sira."

Embaixadór Uniaun Europeia iha Timor-Leste, Marc Friedrich, subliña katak “Sorumutu Ministeriál ba dala 15 ida-ne’e nu’udar momentu importante ida ba konsolidasaun relasoins entre PALOP-TL no Uniaun Europeia, hodi reafirma kompromisu hamutuk ba dezenvolvimentu sustentável grupu ida-ne’e nian.”

Nu’udar parte hosi atividades komplementares sorumutu ida-ne’e nian, ajenda ona vizita sira ba instituisaun prinsipál sira iha Dili, inklui Parlamentu Nasionál, Tribunál Rekursu no Muzeu Rezisténsia. Vizita hirak-ne’e ho objetivu atu hametin lasu istóriku, kulturál no institusionál entre Estadu partisipante sira.