Transmisaun “Página do Governo” edisaun da-6 ho Sekretáriu Estadu Asuntus Toponímia no Organizasaun Urbana
Edisaun daneen hosi programa “Página do Governo” sei transmite aban, sesta-feira, loron 6 fulan-juñu 2025, tuku 8:00 kalan, iha inisiativa ida ne’ebé promove hosi Ministru Prezidénsia Konsellu Ministrus no Portavós Governu, Agio Pereira, iha parseria ho Rádiu no Televizaun Timor-Leste (RTTL). Programa ne’e ho objetivu atu hametin transparénsia governu nian no hakbesik Ezekutivu ba populasaun.
Edisaun ida-ne’e hetan partisipasaun husi Sekretáriu Estadu Asuntus Toponímia no Organizasaun Urbana, Germano Santa Brites. Durante entrevista ne’e, aborda liña prinsipál sira atuasaun nian hosi ninia Sekretaria Estadu, ho énfaze ba medida sira ne'ebé implementa ho objetivu atu organiza espasu urbanu, promove ijiene no garante orden públika iha Dili no munisípiu sira seluk. 
Durante programa ne’e, Germano Santa Brites subliña katak objetivu prinsipál hosi asaun sira ne’ebé hala’o mak atu proteje populasaun no hadi’a kondisaun moris iha área urbana sira. “Primeiru liu Governu IX ninia servisu hakarak salva nia povu sira husi área risku. Ida-ne’e maka responsabilidade primeiru”, nia afirma, hodi reforsa tan katak “Governu ida-ne’e, Estadu nunka atu hakarak nia povu terus. Estadu lakohi atu nia povu terus.” Hodi refere ba importánsia planeamentu urbanu, nia hatutan: "Sidade ne’e atu di’ak oinsá mós ita tenke organiza, maka foin bele di’ak".
Sekretáriu Estadu subliña katak intervensaun sira ne’e hahú ona ho assoins sensibilizasaun iha komunidade sira, sorumutu ho autoridade lokál sira no distribuisaun panfletus informativus, atu nune’e bele garante katak populasaun komprende objetivus no nesesidade kolaborasaun ho servisu públiku sira. 
Programa “Página do Governo” konta ho Nélia Chaves nu’udar aprezentadora no Ika Moniz hanesan produtora ezekutiva, ho apoiu tékniku hosi ekipa mídia sira hosi Gabinete Primeiru-Ministru, Prezidénsia Konsellu Ministrus no Gabinete Sekretáriu Estadu nian.
Portavós Governu, Ministru Agio Pereira, reafirma katak “Página do Governo” nu’udar instrumentu importante ida atu promove prestasaun kontas no diálogu entre Ezekutivu no sidadaun sira”. 
Governu konvida sidadaun hotu-hotu atu akompaña aban, loron 6 fulan-juñu tinan 2025, hahú hosi tuku 8 kalan, transmisaun “Página do Governo” edisaun ida-ne’e nian liuhosi RTTL no iha mídia sosiál, hodi kontribui ba sosiedade ida ne’ebé informadu, partisipativu no komprometidu liu ba dezenvolvimentu Timor-Leste nian. 
