Timor-Leste Eleitu nu’udar Vise-Prezidente Sesaun Asembleia-Jerál Nasoins Unidas ba da-80
Iha loron 2 fulan-juñu tinan 2025, Asembleia- Jerál Nasoins Unidas nian eleje Timor-Leste nu’udar Vise-Prezidente ida ba ninia Sesaun da-80. Reprezentasaun Timor-Leste sei asegura hosi Misaun Permanente ba Nasoins Unidas, ho Reprezentante Permanente país ne’e nian, Dionisio Babo Soares, sei kontribui, iha koordenasaun ho Vise-Prezidentes no Estadu-Membru sira seluk, hodi define ajenda traballu no rezultadu hosi sesaun ne’e.
Sesaun Asembleia-Jerál Nasoins Unidas ba da-80, ho tema “Di’ak-liu Hamutuk” (“Better Together”), sei hala’o entre fulan-setembru tinan 2025 no fulan-setembru tinan 2026, ho nia inísiu formál iha loron 9 fulan-setembru tinan 2025, iha sede Nasoins Unidas nian iha Novaiorke. Tinan-tinan órgaun ida-ne’e halibur reprezentantes hosi Estadus-Membrus ONU nian hotu-hotu hodi diskute no delibera kona-ba kestaun prinsipál sira iha ajenda internasionál, inklui pás no seguransa, dezenvolvimentu sustentável, direitus umanus no reforma ba Nasoins Unidas.
Prezidénsia hosi sesaun Asembleia-Jerál ba da-80 sei asume hosi Annalena Baerbock, eis-Ministra Negósius Estranjeirus Alemaña nian. Aleinde membru permanente na'in-lima hosi Konsellu Seguransa Nasoins Unidas— Xina, Fransa, Rúsia, Reinu Unidu no Estadus Unidus —Vise-Prezidente na'in-16 seluk mak eleitu, ne'ebé reprezenta rejiaun oioin iha mundu: Andorra, Arjentina, Bangladesh, Cabo Verde, Repúblika Demokrátika Kongo, Kénia, Líbanu, Lezotu, Maldivas, Montenegro, São Cristóvão e Neves, Arábia Saudita, Timor-Leste, Tunízia no Venezuela.
