Filipinas Manifesta Apoiu Ofisiál ba Timor-Leste nia Adezaun ba ASEAN
Governu Timor-Leste simu ho laran-haksolok, publikasaun iha loron 22 fulan-maiu tinan 2025 iha website ofisiál Gabinete Komunikasaun Prezidensiál Filipinas nian (Presidential Communications Office - PCO), ne’ebé konfirma apoiu Filipinas ba adezaun plena Timor-Leste nian ba Asosiasaun Nasoins Sudeste Aziátiku (ASEAN). 
Deklarasaun ne’e hato’o hosi Sekretáriu-Adjuntu Departamentu Negósius Estranjeirus Filipinas, Dominic Xavier Imperial durante konferénsia imprensa ida iha Malacañang, iha loron 22 fulan-maiu, iha ámbitu preparasaun ba Simeira ASEAN 2025 ne’ebé sei hala’o iha Kuala Lumpur, Malázia, iha loron 26 to’o 27 fulan-maiu. Simeira ne’e sei prezide hosi Primeiru-Ministru Malázia, Dato’ Seri Anwar Ibrahim, ho tema “Inkluzaun no Sustentabilidade”.
“Ami apoia Timor-Leste nia adezaun ba ASEAN”, afirma Dominic Xavier Imperial, hodi subliña katak asuntu ne’e “konserteza tama iha ajenda” sorumutu lider sira ASEAN nian. Responsavel ne’e hatutan tan katak “membrus ASEAN tuir hela ‘roteiru’ ida ba Timor-Leste nia adezaun ba bloku rejionál ne’e, ne’ebé hatudu grupu ne’e nia kompromisu kontínuu atu aumenta númeru membrus ASEAN nian”.
Apoiu públiku ida-ne’e hosi Filipinas reforsa esforsu sira ne’ebé Timor-Leste halo hodi kumpre kritérius ne’ebé estabelese ona iha Roteiru ba Adezaun Plena, liuliu iha aliñamentu jurídiku, institusionál no polítiku ho pilár tolu Komunidade ASEAN nian.
Governu Timor-Leste reafirma ninia determinasaun atu kontribui ho forma konstrutiva ba objetivus ASEAN no renova ninia kompromisu atu hametin kooperasaun ho Estadu-membru sira hotu, ba benefísiu dame, estabilidade no dezenvolvimentu sustentável iha rejiaun ne’e.
