Governu Timor-Leste

Iha loron 20 fulan-maiu tinan 2025, data ne’ebé komemora aniversáriu Restaurasaun Independénsia ba da-23, Governu hala’o serimónia ofisiál ba lansamentu fatuk dahuluk ba dezenvolvimentu no expansaun Aeroportu Internasionál Prezidente Nicolau Lobato, iha Dili. Inisiativa ne’e marka inísiu husi intervensaun estratéjika ida-ne’ebé ho intensaun atu moderniza infraestrutura aeroportuária ida-ne’e, ho objetivu atu reforsa kapasidade atendimentu pasajeiru no garante kumprimentu ba padraun internasionál seguransa no operasaun nian.

Expansaun ba aeroportu ne’e inklui ampliasaun progresiva ba pista iha faze tolu, konstrusaun ba torre foun kontrolu nian ida, instalasaun ba sistema iluminasaun modernu ida no reabilitasaun terminál pasajeiru nian.

Iha ninia diskursu, Primeiru-Ministru, Kay Rala Xanana Gusmão, destaka importánsia husi momentu ne’e nian, hodi afirma katak “ohin ita selebra Aniversáriu Restaurasaun Independénsia ba da-23. Iha tinan ruanulu-resin-tolu liubá ita asume kompromisu atu konstrui Estadu no Nasaun.” Xefe Governu mós afirma katak “ita iha konxiénsia tomak ba dezafius ne’ebé ita kontinua hasoru, liu-liu iha área infraestruturas, ne’ebé maka hanesan motór esensiál ba dezenvolvimentu.”

Dezenvolvimentu setór infraestruturas reafirma hanesan prioridade Governu Konstitusionál IX nian. “Dezenvolvimentu infraestruturas importante tebetebes ba dezenvolvimentu nasionál, ba ekonomia ida ne’ebé dinámika no produtiva, ba kriasaun empregu no ba konsolidasaun instituisoins iha territóriu nasionál tomak”, deklara Primeiru-Ministru, hodi hatutan tan katak kompromisu ida-ne’e aliña ona ho objetivus Planu Estratéjiku Dezenvolvimentu tinan 2011-2030.

Kay Rala Xanana Gusmão esplika katak “bainhira Governu inisia ninia mandatu, iha loron 1 fulan-jullu tinan 2023, ami halo revizaun ba projetu sira ne’ebé planeia antes, inklui projetu aeroportu, hodi garante ninia sustentabilidade, efikásia no viabilidade kona-ba nesesidade dezenvolvimentu país nian.”

Programa Governu Konstitusionál IX nian identifika transporte aéreu hanesan pilár estratéjiku ida ba kreximentu ekonómiku. Dokumentu ne’e subliña katak “investe iha transportes aéreus maka fundamentál atu responde ba prokura tráfegu aéreu iha futuru, ne’ebé iha relasaun ho kreximentu ekonómiku país nian.” Nune’e, expansaun Aeroportu Internasionál Prezidente Nicolau Lobato ho objetivu atu permite servisu aéreu ida ne’ebé viavel liu entre Timor-Leste no destinus prinsipais rejionais no internasionais, hodi promove dezenvolvimentu turizmu, komérsiu no atividade emprezariál.

"Dezenvolvimentu no expansaun Aeroportu Internasionál Prezidente Nicolau Lobato sei permite kria korredór aéreu modernu sira hodi liga Dili ba kapitál rejionál sira no integra Timor-Leste ho forma efetiva liu iha sistema rejionál no globál", hatete Primeiru-Ministru, hodi hatutan tan katak modernizasaun infraestrutura aeroportuáriu "iha tempu hanesan, sei hametin pozisaun Timor-Leste nian iha ASEAN no rejiaun Ázia Pasífiku ein jerál."

Atu taka ninia diskursu, Primeiru-Ministru reafirma "kompromisu firme [Ezekutivu nian] hodi promove modernizasaun infraestruturas importantes país nian, ho objetivu atu dinamiza kreximentu ekonómiku no hadi'a moris-di'ak populasaun nian, hodi asegura dezenvolvimentu sustentável ba ita-nia nasaun." Nia mós subliña katak "la’ós de’it atu halo ida-ne'e - maibé tenke halo ida-ne'e ho di'ak!", hodi destaka kompromisu atu "garante transparénsia, efisiénsia no efikásia iha prosedimentu no prosesu hotu-hotu ba jestaun investimentu públiku, liuliu iha setór infraestruturas nian".

Xefe Governu espresa mós ninia “rekoñesimentu ba instituisoins ne’ebé kolabora ona ho ita iha esforsu nasionál ida-ne’e, inklui JICA, Banku Aziátiku Dezenvolvimentu no mós Governu Japaun no Austrália, ba apoiu projetu ida-ne’e.”