Governu Timor-Leste

Iha ámbitu selebrasoins aniversáriu Restaurasaun Independénsia Repúblika Demokrátika Timor-Leste nian ba da-23, ho lema “Hametin Pás no Dezenvolvimentu”, inaugura ona iha loron 15 fulan-maiu tinan 2025, iha Portu Dili, espozisaun “Dezenvolvimentu Governasaun Lokál”. 

Serimónia ne’e marka prezensa husi Prezidente Repúblika, José Ramos-Horta, Primeiru-Ministru, Kay Rala Xanana Gusmão, Prezidente Tribunál Rekursu, Afonso Carmona, Ministru Administrasaun Estatál no Prezidente Komisaun Organizadora ba Komemorasaun nian, Tomás do Rosário Cabral no membru Governu sira seluk. 

Espozisaun ne’e hala’o to’o loron 20 fulan-Maiu, aprezenta progresu prinsipál sira ne’ebé munisípiu sira alkansa ona iha prestasaun servisus públikus, hodi destaka papél Autoridades Munisipais no ninia estrutura, ne’ebé hetan apoiu husi Ministériu Administrasaun Estatál no husi ministériu sira seluk ho kompeténsias relevantes. Inisiativa ida-ne’e hanesan oportunidade ida atu fó vizibilidade ba serbisu ne’ebé dezenvolve ona iha kuadru governasaun lokál nian  no hakbesik sidadaun sira ba servisus desentralizadus Estadu nian. 

Durante loron neen espozisaun, munisípiu ida-idak no Autoridade Administrativa Ataúru, iha  espasu própriu ida hodi hatudu produtus artezanais, gastronomia tradisionál no espresaun kulturál sira seluk. Programa ne’e inklui mós atuasaun muzikál husi artista nasionál sira no aprezentasaun dansa kulturál husi munisípiu ida-idak. Organizasaun ba parte ida-ne’e responsabiliza husi Ministériu Komérsiu, Indústria no Ambiente, ne’ebé integra mós iha Komisaun Organizadora ba eventu ne’e. 

Selebrasaun aniversáriu Restaurasaun Independénsia nian ba da-23, inklui mós, iha dadeer loron 19 fulan-maiu, misa agradesimentu ida iha Igreja Paróquia da Imaculada Conceição de Balide, tuir mai serimónia tau ai-funan iha Semitériu Santa Cruz, hodi fó omenajen ba eroi sira país ne’e nian. Iha loron 20 fulan-maiu, data ofisiál ba Restaurasaun Independénsia nian, sei hala’o serimónia hasa’e no hatún Bandeira Nasionál iha Palásiu Prezidensiál Nicolau Lobato. 

Governu konvida populasaun atu partisipa iha komemorasaun sira ne’e no vizita espozisaun iha Portu Dili, hodi sai sasin ba progresu governasaun lokál nian no selebra hamutuk buat hirak ne’ebé hala’o ona dezde Restaurasaun Independénsia.