Lansamentu fatuk ba da-uluk ba Sede Komisaun Funsaun Públika
Ministru Administrasaun Estatál no Ordenamentu Territóriu, Arcângelo Leite, iha Segunda 22 Novembru halo lansamentu Fatuk ba da-uluk atu harii edifísiu Komisaun Funsaun Públika (KFP). Sede foun ne’e hetan fatin iha Vila-Verde, Díli.
Edifísiu hirak atu harii ne’e hatudu ninia dezeñu modernu, hodi hateke ba futuru maibé la haluha tradisaun sira. Edifísiu ne’e sei hetan andar rua, sala konferénsia nian ida no gabinete oin-oin, hetan mós fatin atu pára karreta funsionáriu no ema vizitante sira nian, elevadór no fatin halís hodi fasilita asesu ba ema sira iha defisiénsia fízika.
“Konstrusaun edifísiu foun KFP nian ne’e tenke remata ona iha Novembru tinan oin mai. Ita hein katak ho edifísiu foun ne’e ita bele ona oferese kondisaun hirak di’ak liu tan ba ita nia funsionáriu sira, atu sira bele hala’o sira nia servisu ho efikás no efisiente bainhira atu harii Funsaun Públika ida forte, imparsiál no ho kualidade atu serbí di’ak liu tan povu Timor-Leste”, hateten Libório Pereira, Presidente da KFP.
