Governu Timor-Leste

Primeiru-Ministru, Kay Rala Xanana Gusmão, hala’o vizita ofisiál ida ba Rejiaun Administrativa Espesiál Oekusi Ambenu (RAEOA), husi loron 28 fulan-abríl to’o loron 2 fulan-maiu, ho objetivu atu halo diálogu diretu ho populasaun, akompaña ezekusaun ba infraestrutura prioritária sira no sosializa estratéjia desentralizasaun administrativa no kriasaun órgaun reprezentativu sira ba podér lokál iha Timor-Leste, ho nia implementasaun ne’ebé prepara hela. 

Bainhira to’o, Xefe Governu simu husi autoridade rejionál no membru komunidade sira iha fronteira Sakato. Durante semana ne’e, nia vizita postu administrativu oioin no aldeia sira iha RAEOA, hanesan Sabén, Usapikolen, Pásabe, Tumin, Lelaufe, Bebo no Maunaebeno, iha ne'ebé nia halo diálogu oioin ho populasaun lokál sira. 

Entre asuntu prinsipál sira ne’ebé aborda maka polítika desentralizasaun administrativa, ne’ebé iha objetivu prioridade haat, esplika Primeiru-Ministru, “atu dezenvolve setór privadu iha áreas rurál”, “atu promove instituisaun Estadu ne’ebé forte, lejítimu no estavel iha territóriu tomak”, “atu kria oportunidade foun ba partisipasaun demokrátika” no “atu asegura prestasaun servisu públiku ida ne’ebé efikás no efisiente liu ba sidadaun sira”. Xefe Governu apela ba mobilizasaun intelektuál lokál sira hodi garante katak prosesu implementasaun ne’e preparadu ho di’ak no korresponde ba nesesidade populasaun nian. “Independénsia vale duni bainhira joven sira estuda no sai matenek atu kompromete serbí país ne’e”, nia afirma durante sorumutu iha Pásabe. 

Durante vizita ne’e, Primeiru-Ministru Xanana Gusmão observa mós progresu projetu reabilitasaun ba estrada rurál sira iha Sabén no Bobometo, hodi subliña importánsia husi infraestrutura nu’udar baze ba dezenvolvimentu. “Estrada maka sai hanesan aliserse ba dezenvolvimentu ne’ebé populasaun presiza liu”, nia deklara. Iha sentidu hanesan, nia husu ba Autoridade RAEOA atu elabora projetu ba konstrusaun ponte Noel-Ekat, ne’ebé identifika ona nu’udar prioridade hodi hadi’a mobilidade iha rejiaun ne’e, liu-liu iha tempu udan. Reabilitasaun ba estrada ne’ebé liga Pante-Makasar ba Oesilu ne’ebé nia naruk kuaze kilómetru 17 mós hala’o hela. 

Ajenda ne’e inklui mós vizita ba fatin konstrusaun Igreja João Paulo II nian, iha Pásabe, no konvite ne’e haruka ba grupu tradisionál Usitako Tebedai hodi reprezenta kultura Atoni iha Konferénsia Komunidade Luzu-Aziátika (Asian Portuguese Community Conference - APCC) tuirmai, ne'ebé sei hala'o iha Dili iha finál fulan-juñu. “Ha’u husu atu ita-boot sira hatudu ita-boot sira-nia rikusoin kulturál iha konferénsia ida-ne’e”, afirma Primeiru-Ministru. 

Iha diálogu ho komunidade Abani ne’e, Xefe Governu reafirma Timor-Leste nia pozisaun kona-ba delimitasaun fronteira iha Naktuka, bazeia ba tratadu ne’ebé asina ona entre Portugál no Olanda iha tinan 1904. “Ita sei tuir akordu fronteira entre Olanda no Portugal”, garante Xanana Gumão, hodi apela ba povu Atoni atu labele rona lia-anin sira no konsentra liu ba esforsu hamutuk hodi dezenvolve Oekusi 

Programa Governu Konstitusionál IX estabelese katak, “atu alkansa soberania tomak, Timor-Leste tenke kompleta definisaun fronteira terrestre no marítima ho Indonézia, tuir direitu internasionál, nu’udar prioridade nasionál”.

Tuir Programa Governu, “partisipasaun efetiva sosiedade no komunidade sira-nian iha prosesu dezenvolvimentu ba sira-nia rejiaun maka sai hanesan fatór determinante atu alkansa benefísiu konkretu iha sira-nia moris, hodi kontribui ba kreximentu sosioekonómiku no kulturál ne’ebé responsavel, transparente no sustentável”. 

Bazeia ba prinsípiu hirak-ne’e, Ezekutivu ne’e “sei kontinua investe iha estrutura governasaun rejionál, liuhosi polítika inovadora no aposta iha paradigma dezenvolvimentu foun ne’ebé bazeia ba ekonomia merkadu sosiál”.