Gravasaun Epizódiu Dasiak husi Programa “Página do Governo” ho Ministru Komérsiu no Indústria
Ministru Komérsiu no Indústria, Filipus Nino Pereira, ohin dadeer, loron 5 fulan-maiu tinan 2025, partisipa iha gravasaun epizódiu dasiak husi programa “Página do Governo”, ne’ebé sei transmite iha tempu besik husi Rádiu no Televizaun Timor-Leste (RTTL) no divulga iha plataforma dijitál sira Governu nian. 
Durante entrevista, Ministru Filipus Nino Pereira, aprezenta vizaun estratéjika Ministériu Komérsiu no Indústria nian ba tinan sira tuirmai, hodi destaka, reforsa setór privadu, promove esportasaun, hadi’a infraestrutura lojístika, dada investimentu estranjeiru no promove dijitalizasaun no sustentabilidade industriál nu’udar prioridade prinsipál sira.
Governante ne’e explika mós medida sira ne’ebé hala’o hela hodi harii ambiente negósius nian ida ne’ebé atrativu no kompetitivu ba emprendedór timoroan sira, nune’e mós estratéjia Governu nian atu diversifika ekonomia, kapasita forsa traballu nasionál no promove kreximentu inkluzivu liuhusi apoiu ba kooperativa sira no ba ekonomia nasionál. 
Programa ne’e ko’alia mós dezafiu no oportunidade sira iha setór komérsiu no indústria, no Ministru fahe ninia vizaun kona-ba dezenvolvimentu ekonomia país nian iha futuru, hodi reafirma kompromisu Governu nian ba modelu kreximentu ida ne’ebé sustentavel, reziliente bazeia ba kriasaun empregu no valorizasaun produsaun nasionál. 
“Página do Governo” promove hosi Ministru Prezidénsia Konsellu Ministrus no Portavós Governu, Agio Pereira, iha parseria ho RTTL. Iha programa ne’e konta ho Nélia Chaves nu’udar aprezentadora, Ika Moniz nu’udar produtora ezekutiva no apoiu tékniku hosi ekipa mídia sira Gabinete Primeiru-Ministru nian, Gabinete Portavós Governu no hosi Gabinete membru Governu nian ne’ebé hetan entrevista. Plataforma ida-ne’e ho objetivu atu hametin transparénsia no prosimidade entre Ezekutivu no sidadaun sira, hodi permite populasaun akompaña, ho forma asesivel no informadu, asaun prinsipál no polítika públika sira ne’ebé la’o hela. 
Iha sesta semana ne’e, loron 9 fulan-maiu, tuku 8 kalan, sei transmite epizódiu ho Ministru Negósius Estranjeirus no Kooperasaun, Bendito dos Santos Freitas, ne’ebé sei ko’alia kona-ba polítika esterna no prosesu adezaun plena Timor-Leste nian ba ASEAN. Governu konvida sidadaun hotu-hotu atu akompaña transmisaun ne’e, ne’ebé sei fó-sai iha RTTL no iha rede sosiál ofisiál sira.
Atu haree programa anteriór sira husi Pájina Governu nian ne’ebé transmite ona ho Ministru Administrasaun Estatál hanehan iha-ne’e, ho Ministru Obras Públikas hanehan iha-ne’e, no ho Ministru Planeamentu no Investimentu Estratéjiku hanehan iha-ne’e.
