Governu Partisipa iha Sesaun Aprezentasaun Relatóriu Programa JENESYS2024 iha Embaixada Japaun
Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, no Ministru Juventude, Desportu, Arte no Kultura, Nelyo Isaac Sarmento, marka prezensa iha sesaun aprezentasaun relatóriu hosi partisipante timoroan sira iha programa JENESYS2024 (Japan-East Asia Network of Exchange for Students and Youths), ne’ebé realiza hosi Embaixadór Tetsuya Kimura, iha loron 24 fulan-abríl tinan 2025, iha Embaixada Japaun iha Timor-Leste. 
JENESYS hanesan programa interkámbiu inter-pesoál ne’ebé promove hosi Governu Japaun ho objetivu atu hametin lasu amizade no komprensaun mútua entre Japaun no nasaun Ázia-Pasífiku sira. Dezde nia kriasaun iha tinan 2009, joven timoroan liu 1.800 maka partisipa iha inisiativa ida-ne'e, inklui iha formatus online. Iha tinan fiskál 2024-2025, joven timoroan na'in-121 maka selesionadu hodi partisipa iha atividade oioin iha Japaun, ne'ebé inklui tópiku sira hanesan interkámbiu kulturál Japaun nian, desportu iha artikulasaun ho Objetivus Dezenvolvimentu Sustentável (ODS), no konferénsia estudante sira nian. 
Durante serimónia, joven sira deskreve sira-nia esperiénsia no reflete kona-ba aprendizajen ne'ebé hetan, no mós planu asaun sira ne'ebé sira tau iha prátika hafoin fila mai rai-laran. 
Iha nia diskursu, Vise-Primeiru-Ministru subliña importánsia atu aplika valór dixiplina, persisténsia no inovasaun nian ba progresu nasionál, hodi afirma katak “joven timoroan sira tenke prepara-an atu kompete iha palku globál, ho kapasidade ba inovasaun, domíniu profisionál no teknolójiku”.
Ministru Nelyo Isaac Sarmento destaka relevánsia husi oportunidade hirak-ne’e ba juventude, hodi haktuir katak “partisipasaun husi estudante sira iha Japaun importante tebes tanba sira bele buka koñesimentu, domina lian no kultura Japaun nian no mós prepara an di’ak liután ba kontribuisaun sira iha futuru ba nasaun ne’e”. 
Embaixadór Japaun ne’e hatutan, dezde tinan 2009, joven timoroan liu 1.800 maka partisipa iha programa JENESYS, tantu prezensiál no formatu online. Nia subliña katak inisiativa ida-ne’e nu’udar plataforma ida hodi hametin lasu amizade entre Japaun no Timor-Leste no hato’o esperansa katak “esperiénsia sira ne’ebé moris iha Japaun sei sai hanesan inspirasaun ba joven sira hodi dezenvolve sira-nia kapasidade no lideransa”. Nia mós enkoraja partisipante sira atu involve nafatin liuhosi Asosiasaun Alumni JENESYS iha Timor-Leste.
