Governu reforsa divulgasaun regras foun Programa Merenda Eskolár nian ba entidade implementadora sira
Ministériu Administrasaun Estatál (MAE), hamutuk ho Ministériu Edukasaun (ME) no Ministériu Saúde (MS), iha loron 24 fulan-abríl tinan 2025, promove asaun divulgasaun nasionál ida kona-ba regras foun Programa Merenda Eskolár (PME), ne’ebé dirije ba ninia implementadór prinsipál sira, iha eventu ida ne’ebé hala’o iha City-8, iha Dili. Objetivu prinsipál husi inisiativa ida-ne’e atu garante aliñamentu tékniku no administrativu entre entidade hot-hotu ne’ebé envolve iha operasionalizasaun programa, tuir enkuadramentu legál foun ne’ebé estabelese ona husi Dekretu-Lei n. 61/2022 no Dekretu Governu n. 3/2025.
Hodi rekoñese importánsia hosi alimentasaun adekuada ba kreximentu saudavel, aprendizajen efetivu no hamenus dezigualdade sira, Governu lansa Programa Merenda Eskolár hanesan inisiativa estratéjiku ida atu garante asesu universál no ekuitativu ba hahán nutritivu sira iha estabelesimentu edukasaun pré-eskolár no ensinu báziku iha territóriu nasionál tomak.
Programa ne’e atribui subsídiu ida iha ámbitu asaun sosiál eskolár nian, ho objetivu atu garante direitu ba refeisaun diária, saudavel no ekilibrada, ne’ebé importante tebetebes ba dezenvolvimentu labarik nian.
Aleinde atu kombate inseguransa ai-han no hadi’a dezempeñu eskolár, Programa Merenda Eskolár ne’e mós ho objetivu atu promove dezenvolvimentu sustentável ba komunidade sira liuhosi promove produsaun no konsumu ai-han ne’ebé mai-husi agrikultura lokál. Nune’e, ninia implementasaun hanesan kompromisu ida ne’ebé firme husi Estadu ba moris-di’ak no futuru labarik timoroan sira nian, nune’e mós kontribui ba halakon hamlaha, reforsa ekonomia lokál no dezenvolvimentu kapitál umanu nasionál.
Dekretu Governu n. 3/2025 define prosedimentu no padraun sira atu implementa PME ne’e ho efikás no sustentável, klarifika responsabilidade sira hosi parte oioin, no mós mekanizmu monitorizasaun no avaliasaun ne'ebé nesesáriu atu asegura transparénsia no kualidade iha ezekusaun ba programa.
Konsidera hanesan implementadór sira programa nian mak, estabelesimentu edukasaun pré-eskolár no ensinu báziku-públiku, partikulár no kooperativu sira - ne’ebé integra iha rede públika Estadu nian, no mós organizasaun no grupu komunitáriu sira, maski sira harii ho forma asosiativa informál.
Durante abertura enkontru ne’e, Diretór-Jerál Desentralizasaun no Podér Lokál MAE, Antonio Augusto Guterres, subliña importánsia atu halo revizaun ba manuál implementasaun Programa Merenda Eskolár nian, ne’ebé agora adapta ho enkuadramentu lejizlativu foun, no reforsa nesesidade koordenasaun ida ne’ebé efisiente entre nivel sentrál no munisipál hodi asegura ezekusaun ida ne’ebé efikás no koerente.
Atualizasaun manuál ne’e ho objetivu atu fornese orientasaun téknika ne’ebé klaru ba diretór eskolár, autoridade munisipál, inspetór no parseiru lokál sira, hodi garante katak merenda eskolár prienxe kritériu kualidade nutrisionál ne’ebé rigorozu. Hanesan esplika hosi Marcelo Caetano, reprezentante husi Ministériu Edukasaun, “atu hamenus malnutrisaun no motiva estudante sira atu badinas bá eskola, ami sei konsentra iha prosedimentu implementasaun iha nivel báziku”. Nia hatutan, medida ida-ne’e reforsa papél merenda eskolár hanesan instrumentu esensiál hodi promove saúde no susesu eskolár.
Manuál foun, ne’ebé aprova hosi membrus Governu ne’ebé responsavel ba área administrasaun estatál, edukasaun no saúde nian, subliña mós importánsia hosi fiskalizasaun ida ne’ebé rigoroza hosi autoridade kompetente sira. “Ami husu ba implementadór sira, liu-liu inspetór merenda eskolár sira husi eskola ida-idak, atu asegura kontrolu rigorozu ba programa ida-ne’e, hodi evita impaktu negativu ba estudante sira-nia saúde, no tau prioridade ba utilizasaun produtu lokál sira”, apela Marcelo Caetano.
Sesaun divulgasaun ne’e sura ho prezensa husi autoridade munisipál, diretór eskolár, reprezentante organizasaun naun-governamentál nasionál no internasionál sira, no mós parseiru dezenvolvimentu sira, inklui CARE Internasionál no Programa Alimentár Mundiál, ne’ebé durante ne’e fó apoiu tékniku no lojístiku ba Governu iha implementasaun no revizaun ba Programa Merenda Eskolár liuhosi programa HATUTAN.
Prezidente Autoridade Munisipál Ermera, José Martinho dos Santos Soares, subliña katak “asaun sensibilizasaun ida-ne’e kontribui maka’as atu implementadór sira kompriende kona-ba prosesu no knaar ne’ebé monu ba sira iha ezekusaun programa nian”, garante kompromisu kontínuu hosi autoridade lokál sira hodi kolabora ho parseiru sira atu asegura refeisaun eskolár ne’ebé seguru no nutritivu.
Governu fó-hanoin katak, Programa Merenda Eskolár ne’e desentraliza ona, hodi atribui kompeténsia direta ba autoridade munisipál sira atu ezekuta programa refere. Valór kada refeisaun ajusta hosi 0.25 ba 0.42 sentavus, hodi reflete nesesidade atu asegura padraun adekuadu kona-ba kualidade nutrisionál. Refeisaun sira ne’e sei oferese ba labarik sira iha oras tuku 10 dadeer ba estudante sira dadeer nian no iha oras tuku 3 lokraik ba estudante sira lokraik nian. Tenke prepara refeisaun sira ne’e ho pelumenus produtu lokál 75%, hodi respeita padraun ijiene no seguransa ai-han nian ne’ebé rigorozu, atu nune’e bele prezerva ninia kondisaun ne’ebé fresku no garante saúde ba benefisiáriu sira.
