Governu Timor-Leste

Vise-Ministru Komérsiu no Indústria, Augusto Júnior Trindade, partisipa iha Sorumutu Funsionárius Importante Ekonomia ASEAN (SEOM 2/56) nian ba Daruak, ne'ebé hala'o hosi loron 21 to’o 24 fulan-abríl tinan 2025, iha kontestu prezidénsia Malázia nian ba ASEAN. Vise-Ministru ne’e reprezenta Timor-Leste nu’udar nasaun observadór, hodi reafirma kompromisu nasionál ba prosesu adezaun plena bloku rejionál nian.

Durante sesaun traballu, Augusto Júnior Trindade destaka importánsia papél SEOM nian iha formulasaun proposta sira ne’ebé sei submete atu hetan apresiasaun husi Ministrus Ekonomia ASEAN, ne’ebé subliña relevánsia akordu ekonómiku sira hodi fortalese arkitetura jurídika no institusionál ASEAN. “Ami rekoñese relevánsia hosi akordu sira-ne’e hodi hametin arkitetura jurídika no ekonómika ASEAN, no ami reafirma ami-nia kompromisu hodi aliña ho estrutura jurídika no prioridade bloku nian”, tenik Vise-Ministru hodi hatutan katak Timor-Leste preparadu atu adere ba Akordu Ekonómiku 66 ASEAN nian no implementa asaun sira ne’ebé hatuur iha Lista Prioridades Roteiru Adezaun nian.

Durante sorumutu ne’e, Vise-Ministru hala’o sorumutu bilaterál ida ho Diretór Ezekutivu hosi Institutu Investigasaun Ekonómika ba ASEAN no Ázia Leste (ERIA), Aladdin Rillo, iha Eastern & Oriental Hotel, iha ne’ebé aprezenta áreas atuasaun ERIA nian no diskute oinsá kooperasaun iha futuru. Diálogu ne’e foka liu ba estratéjia dezenvolvimentu ekonómiku sustentável no nesesidade husi polítika públika ne’eb’e bazeia ba evidénsias, ho objetivu atu fasilita Timor-Leste nia integrasaun iha estrutura ekonómika ASEAN no rejiaun Ázia Leste nian. Parte rua hatudu interese mútuu hodi hametin kolaborasaun téknika no analítika.

Sorumutu SEOM 2/56 ne’e ho objetivus prinsipál atu avalia progresu kona-ba prioridade sira prezidénsia Malázia nian, liuliu iha área komérsiu, investimentu, sustentabilidade, integrasaun rejionál no dezenvolvimentu ekonomia dijitál. Ajenda ne’e, inklui mós preparasaun Sorumutu Ministrus Ekonomia ASEAN nian tuirmai, ne’ebé sei halo análize ba implementasaun Akordu Parseria Ekonómika Abranjente Rejionál (RCEP), no atualiza Akordu kona-ba Komérsiu Sasán ASEAN nian (ATIGA), nune’e mós hametin kooperasaun ho parseiru diálogu sira hanesan Xina, Índia, Japaun no Koreia Súl.

Ho lema “Inkluzividade no Sustentabilidade”, prezidénsia Malázia nian define hanesan prioridade diresaun estratéjika sira hodi promove komérsiu no investimentu, elabora roteiru ida ba inkluzaun, reforsa konektividade ekonómika no konsolida ekonomia dijitál ida ne’ebé reziliente. Partisipasaun Timor-Leste iha plataforma altu nivel ida-ne’e reforsa nia integrasaun graduál iha ASEAN nia laran no kontribui hodi aliña ninia polítika ho padraun no objetivu komún sira bloku rejionál nian.