Timor-Leste no Vietnam hakarak koopera área komérsiu no indústria
Governu Timor-Leste, liu hosi Ministériu Turizmu, Komérsiu no Industria (MTKI) iha kooperasaun di’ak iha área komérsiu no indústria ho Repúblika Sosialista Vietnam.
Ho relasaun di’ak ne’ebé iha, delegasaun kompostu hosi ema hamutuk sanulu resin ida reprezenta Governu Vietnam ho setór privadu hala’o vizita mai Timor-Leste, Kuarta (03/11/2010) hodi hasoru malu no koalia kona-ba futuru komérsiu no indústria nasaun rua nian ho Ministru Turizmu, Komérsiu no Indústria, Gil da Costa Alves, no Autoridade Kámara Komérsiu Indústria Timor-Leste (KKI-TL).
Iha intrevizta ho Jornalizta sira iha salaun konferénsia eis-Merkadu Lama, Dili, Kinta (04/11/2010), Xefe delegasaun hosi Vietnam, Dao Ngoc Chuong, hateten sira prontu atu apoia Timor-Leste iha área komérsiu no indústria no kontenti tebes tanba oda-matan Timor-Leste nakloke ba sira atu mai hala’o inveztimentu.
Diretór-Jerál Azia Pasifik, Departementu Merkadu ne’e hateten, sira hosi Vietnam hakarak hala’o inveztimentu iha Timor-Leste liu-liu iha área agrikultura, rekursu naturál no área komérsiu no indústria seluk.
Delegasaun hasoru malu ho reprezentante CCI-TL hodi koalia ho setór privadu sira atu oinsá bele iha involvimentu di’ak iha dezenvolvimentu komérsiu no indústria Timor-Leste no Repúblika Sosialista Vietnam.
Entertantu, Diretór Nasionál Komérsiu Esternu (DNCE), Hélio Sinatra Tavares, iha nia intervensaun ba Jornalizta sira esklarese katak, nia parte iha komitimentu bo’ot hametin kooperasaun di’ak ho Vietnam iha área komérsiu no indústria.
Hélio Sinatra Tavares, informa vizita delegasaun hosi Vietnam iha Timor-Leste mós koalia kona-ba akordu ne’ebé Timor-Leste hala’o ho Vietnam iha área komérsiu, liu-liu oinsá mak nasaun rua ne’e bele sosa no fa’an sasán ka produtu ba malu atu nune’e bele hasa’e ekonomia nasaun rua nian.
Vietnam hanesan nasaun ida-ne’ebe ninia ekonomia haksoit sa’e lalais de’it hafoin funu.Vietnam mós koñesidu hanesan nasaun ne’ebé produsaun fós barak liu iha mundu,no nasaun barak mak ba sosa fós iha nasaun ne’e inklui Timor-Leste.
