Ministra Saúde Inaugura Sala Internamentu no Armazén Ai-moruk iha Vikeke no Anunsia Inísiu konstrusaun Ospitál Munisipál Foun iha tinan 2026
Ministra Saúde, Élia A. A. dos Reis Amaral, iha loron 14 fulan-abríl tinan 2025, inaugura sala internamentu foun no armazén ai-moruk iha Servisu Saúde Munisipál Vikeke, ne’ebé reforsa kompromisu Governu IX nian atu hadi’a prestasaun kuidadus saúde ho kualidade, seguru no asesivel ba populasaun iha territóriu nasionál tomak. 
Durante serimónia, Ministra haktuir katak “inaugurasaun ba sala internamentu no armazén ai-moruk nian nu’udar pasu importante iha kompromisu Governu IX nian atu fó kuidadus saúde ho kualidade, seguru, no asesivel ba populasaun iha territóriu laran tomak”. Nia subliña mós katak armazén foun ne’e “nu’udar pasu fundamentál ida hodi hadi’a jestaun no disponibilidade ai-moruk nesesáriu no esensiál sira iha Servisu Saúde Munisipál Vikeke. Hodi lokaliza armazén ne’e besik ba komunidade, ita bele rezolve problema balun ne’ebé relasiona ho ai-moruk”. 
Governante ne’e salienta mós katak prosimidade armazén foun ba unidade saúde sira sei hadi’a seguransa no kualidade medikamentus, no mós fasilita profisionál saúde sira hodi halo rekizisaun no distribuisaun. Kona-ba sala internamentu foun, ne’ebé instala iha espasu ne’ebé molok ne’e uza ba izolamentu durante pandemia Covid-19, Ministra destaka ninia potensiál atu reforsa atendimentu médiku tempu naruk nian ne’ebé presta iha Vikeke. “Ha’u fiar katak professional saúde sira bele hadi’a kualidade atendimentu ba longu prazu ba ita-nia populasaun ka ba ema-moras sira ne’ebé presiza akompañamentu husi parte médiku sira iha internamentu Vikeke”, nia afirma. 
Iha biban hanesan, Ministra anunsia katak Governu planeia atu tau fatuk dahuluk ba konstrusaun Ospitál Munisipál foun iha Vikeke iha tinan 2026, nu’udar parte ida hosi planu estratéjiku atu hametin infraestrutura ospitál sira iha nivel nasionál.
Inaugurasaun ne’e sura ho partisipasaun husi Prezidente Autoridade Munisipál Vikeke, kuadrus Servisu Sentrál Ministériu Saúde, Diretór Servisu Saúde Munisipál Vikeke, reprezentante Polísia Nasionál Timor-Leste, autoridade administrativa no lokál, reprezentante husi konfisaun relijioza sira, mídia, estudante, membru komunidade no konvidadu sira seluk. 
