“Página do Governo” Destaka Reforma iha Setór Justisa liuhosi Entrevista ho Ministru Sérgio Hornai
Ministru Justisa, Sérgio de Jesus Fernandes da Costa Hornai, partisipa ohin dadeer, loron 15 fulan-abríl 2025, iha gravasaun epizódiu foun husi programa “Página do Governo”, ne’ebé iha tempu badak sei fó-sai liuhusi Rádiu no Televizaun Timor-Leste (RTTL) no habelar iha plataforma dijitál sira Governu nian. Epizódiu ne’e foka liu ba prioridade prinsipál sira setór justisa nian no reforma sira ne’ebé hala’o daudaun atu garante sistema justisa ida ne’ebé forte, transparente no efetivu ne’ebé inspira konfiansa iha populasaun no kontribui ba dezenvolvimentu nasionál ne’ebé sustentável. 
Iha entrevista ne’e, Ministru aprezenta vizaun estratéjiku husi nia mandatu, hodi destaka kompromisu Governu atu hametin Estadu direitu demokrátiku, hadi’a irregularidade sira iha pasadu no konsolida instituisaun sira ne’ebé responsavel no inkluziva. Entre prioridade sira ne'ebé destaka maka desentralizasaun servisu judisiál, alargamentu mapa judisiáriu no simplifikasaun ba prosedimentu legál sira, ho objetivu atu hadi'a asesu ba justisa, liuliu ba komunidade sira ne'ebé vulneravel iha área rurál. 
Ministru aborda mós importánsia reforsu Polísia Sientífika Investigasaun Kriminál (PCIC, akrónimu iha lian portugés) nian, liuhosi formasaun téknika kontínua, modernizasaun teknolojia forense no fortalesimentu infraestruturas, ne’ebé destaka mós nesesidade parseria ho entidade internasionál sira hodi kombate krime transnasionál. Kona-ba kombate korrupsaun, nia realsa katak Governu dezenvolve hela estratéjia abranjente ida, ho medidas konkreta hodi garante integridade sistema judisiál nian no hetan fila-fali konfiansa sidadaun sira nian.
Kona-ba promosaun igualdade jéneru iha setór justisa, Ministru reafirma kompromisu Governu atu integra abordajen jéneru iha polítika judisiál hotu-hotu, ho kriasaun mekanizmus atu kombate violénsia bazeia ba jéneru no formasaun kontínua ba profisionál sira iha setór ne’e. Nia subliña mós aliñamentu polítika sira Ministériu nian ho Objetivus Dezenvolvimentu Sustentável Ajenda 2030, liuliu ho Objetivu 16, ne'ebé hakarak promove sosiedades ne'ebé pasífika, justa no inkluziva. 
Sérgio Hornai mós fahe nia vizaun ba tempu naruk ba setór ne’e, bazeia ba konstrusaun sistema justisa ida ne’ebé modernu no inkluzivu, ho instituisaun sólidu ne’ebé bele sustenta progresu nasionál. Nia refere mós ba kontribuisaun hosi parseiru internasionál sira no hosi nasaun belun sira, ne'ebé maka sira-nia apoiu importante ona hodi reforsa instituisaun judisiál no promove formasaun téknika no profisionál ba rekursus umanus iha setór ne’e.
“Página do Governo” ne’e promove hosi Ministru Prezidénsia Konsellu Ministrus no Portavós Governu, Agio Pereira, iha parseria ho RTTL. Iha programa ne’e konta ho Nélia Chaves nu’udar aprezentadora, Ika Moniz nu’udar produtora ezekutiva no apoiu tékniku hosi ekipa mídia sira Gabinete Primeiru-Ministru, Gabinete Portavós Governu no hosi Gabinete membru Governu nian ne’ebé hetan entrevista. Plataforma ida-ne’e ho objetivu atu garante transparénsia no prosimidade ne’ebé boot-liu entre Governu no sidadaun sira, hodi permite populasaun akompaña, ho dalan asesivel no informadu, asaun prinsipál no polítika públika sira ne’ebé la’o hela. 
Atu haree programas “Página do Governo” anteriór ne’ebé transmite ona ho Ministru Administrasaun Estatál hanehan iha-ne’e, ho Ministru Obras Públikas hanehan iha-ne’e, no ho Ministru Planeamentu no Investimentu Estratéjiku hanehan iha-ne’e.
