Primeiru-Ministru Hahú Vizita Ofisiál ba Provínsia Hunan Xina hodi Hametin Kooperasaun Bilaterál
Primeiru-Ministru Kay Rala Xanana Gusmão, iha domingu ne’e, loron 13 fulan-abríl tinan 2025, hahú vizita ofisiál ida ba Provínsia Hunan, iha Repúblika Populár Xina. Bainhira to’o iha Aeroportu Internasionál Huanghua iha Changsha, kapitál provinsiál, Xefe Governu simu ho laran-ksolok husi Governadór Hunan, Mao Weiming, Vise-Prezidente Komisaun Permanente Asembleia Populár Provínsia nian, Wang Junshou, Embaixadór Xina mai Timor-Leste, Wang Wenli, Embaixadór Timor-Leste iha Xina, Loro Horta, no reprezentantes diplomátiku, autoridade lokál no estudante timoroan sira. 
Vizita ne’e halo parte iha kuadru kooperasaun bilaterál entre Timor-Leste no Provínsia Hunan, ho énfaze ba relasaun amizade no interkámbiu ne’ebé estabelese ona iha dékada ida liubá ho Munisípiu Manatutu. “Beinvindu, Primeiru-Ministru Xanana Gusmão. Ami sente onradu no agradese tebes tanba bele sai uma-na’in ba Ita-Boot nia vizita mai Provínsia Hunan, ne’ebé sei kontribui hodi hametin kooperasaun ne’ebé eziste ona,” afirma Governadór Mao Weiming durante serimónia boazvindas nian. 
Durante loron lima vizita, hosi loron 13 to’o 17 fulan-abríl, Primeiru-Ministru sei akompaña hosi Ministru Administrasaun Estatál, Tomás do Rosário Cabral, no Ministru Planeamentu no Investimentu Estratéjiku, Gastão Francisco de Sousa, aleinde Prezidente sira hosi Autoridade Munisipál Baukau, Ainaru, Manatutu, Kovalima no Manufahi.
Durante vizita, sei aprezenta projetus kooperasaun ne'ebé propoin ba munisípiu ida-idak iha Timor-Leste, ne'ebé foka iha área agrikultura, pekuária no peskas nian, ho objetivu atu estabelese parserias foun ho autoridades Provínsia Hunan nian. Iha segunda-feira dadeer, loron 14 fulan-abríl, Xefe Governu sei fó omenajen ba lider istóriku Mao Zedong, ho vizita ida ba prasa no antiga rezidénsia, ne'ebé lokaliza iha Shaoshan. Iha loron hanesan, iha loraik, sei vizita Institutu Jeolojia Provínsia Hunan nian, ne'ebé sei hala'o sorumutu ida ho responsavel sira instituisaun nian hodi esplora oportunidades ba kooperasaun sientífika no téknika. 
Iha ajenda inklui mós vizita ba Parke Industriál Zhuzhou Beidou, Sentru Espozisaun Fogu Artifisiál Internasionál Liuyang Qingtai, Sidade Industriál Intelijente empreza Zoomlion nian, no mós vizita ba instalasaun Royal Group Hunan Youshi Dairy Co. Ltd. Vizita sira-ne'e ho objetivu atu identifika oportunidades investimentu no transferénsia koñesimentu ba Timor-Leste. 
Durante tinan sanulu-resin-ida ikus ne’e, Timor-Leste no Provínsia Hunan konsolida ona relasaun kooperasaun ida ne’ebé abranje setór oioin hanesan turizmu, interkámbiu kulturál, edukasaun, agrikultura no akuakultura. Iha loron 5 fulan-maiu tinan 2024, selebra aniversáriu ba dala 10 hosi akordu amizade entre Manatutu no Hunan, ho prezensa hosi Vise-Governadór Zhang Jian Fei iha Timor-Leste. Iha ámbitu husi kooperasaun ida-ne'e, Provínsia Hunan kontribui ona ekipamentu agríkola sira, hanesan tratór, no materiál edukativu ba eskola sira iha Timor-Leste, hodi reforsa nia kompromisu ba dezenvolvimentu sustentável no hametin relasaun bilaterál. Populasaun Manatutu mós hetan benefísiu hosi fahe koñesimentu no esperiénsia téknika sira, ho impaktu diretu ba promosaun progresu ekonómiku lokál. Iha loron 3 fulan-abríl, Manatutu simu ambulánsia tolu ne’ebé oferese husi Provínsia Hunan. 
