Governu Timor-Leste

Primeiru-Ministru Repúblika Demokrátiku Timor-Leste (RDTL), Kay Rala Xanana Gusmao, hala’o vizita loron tolu ba Shanghai, Repúblika Populár Xina, iha loron 29 to’o loron 31 fulan Outubru tinan 2010 liubá. Objetivu hosi vizita ne’e atu partisipa serimónia enserramentu Expo Shanghai 2010.

Ba loron dahuluk iha vizita ne’ebá Primeiru-Ministru ho ninia komitiva hala’o vizita ba Pavillaun Timor-Leste nian iha Expo Shanghai. Iha nia diskursu Xefe Ezekutivu ne’e hateten katak,“Tuir testamuña sira ne’ebé hau rona iha fulan neen (6) nia laran, la’os prematur atu dehan Expozisaun Mundiál ida-ne’e, laiha tan, marjen ba dúvida katak susesu bo’ot. Susesu iha ninia organizasaun, susesu ba tema ne’ebé hili, ninia beleza no inovasaun hosi reprezentasaun pavillaun sira, mós iha ninia kooperasaun no sinerjia harii hosi rai barak no liu-liu hosi ukun-nain sira iha rai Xina no Timor-Leste nian”. Aleinde ne’e la haluha atu fó agradese ba asisténsia ne’ebé Governu Xinés fó ba Timor-Leste ba dahuluk nu’udar rai independente ne’ebé hola parte iha eventu mundiál ida-ne’e”.

Númeru vzsitante sira-ne’ebé vzsita Pavillaun Timor-Leste nian, liu hosi millaun 4.5, númeru ida-ne’e liu tiha ona ami nia espetativa. Ema liu millaun haat pontu lima mak koñese uitoan kona-ba ami nia istória, kultura, hatene uitoan kona-ba beleza no buat furak balun hosi paizajen naturál nian iha ami nia nasaun”, hatutan Xanana.

Aleinde halo vizita ba pavillaun Timor-Leste nian, iha biban ne’ebá, iha loron 30 fulan Outubru 2010, PM, Kay Rala Xanana Gusmão, ho delegasaun hala’o mós vizita ba Pavillaun rai seluk no kompañia bobot sira-ne’ebé marka prezensa iha Expo Shanghai 2010, hanesan Pavillaun Xina nian, Pavillaun Angola, Pavillaun Maroko, Pavillaun Árabe Saudita, China Oil Pavilion, Shanghai Cooperation Pavilion, China Aviation Pavilion no SAIC-GM Pavilion.

Primeiru-Ministru mós haktuir katak, “Timor-Leste buka aprende barak ho Xina, tanba sira iha kbi’it hodi dezenvolve sira nia ekonomia, kultura servisu. Timor-Leste nu’udar rai-foun foin ukun rasik-an, buka atu muda mentalidade no kultura servisu nian, buka hakaas-an makaas hodi dezenvolve rai ida-ne’e”.

Ho vizita sira ne’e ho sentidu atu hatudu katak Timor-Leste buka ninia parseiru ba dezenvolvimentu infra-estrutura bázika ekonómika, ne’ebé sai hanesan prioridade iha Planu Estratéjiku Desenvolvimentu Nasionál (PEDN), ne’ebé foin dadaun Primeiru-Ministru rasik hala’o ona sosializasaun ba sub-distritu neen nulu resin lima (65) iha Timor-Leste tomak.

Iha loron 31 fulan Outubru 2010 Primeiru-Minsitru, Kay Rala Xanana Gusmão, partisipa iha serimónia enserramentu Expo Shanghai, ne’ebé taka hosi Primeiru-Ministru Repúblika Populár Xina, Wen Jia Bao.

Iha loron atus ida walu nulu resin haat liubá, ita hotu hamutuk hala’o espozisaun ne’e ho susesu no ita hotu sei la haluha. Expo Mundiál iha Shanghai ne’e susesu tanba hetan partisipasaun hosi nasaun 190 no organizasaun internasionál hamutuk 56, kontribuisaun hosi voluntáriu sira hamutuk liu tokon rua no hetan atensaun hosi vizitante 73,08 milliaun ” hateten  Wen Jia Bao .

Iha serimónia enserramentu ne’e mós Komisaun Organizadora Expo Shanghai 2010 entrega bandeira Bureau of International Expositions (BIE) ba Milan, Itália nu’udar uma-nain ba Expozisaun Mundiál iha tinan 2015.

Atu haree liu tan fotografia sira kona-ba Timor-Leste nian iha Expo 2010 Xangai, klik iha ne’e.