Ministru Komérsiu no Indústria Partisipa iha Retiru Ministrus Ekonomia ASEAN nian ba da-31
Ministru Komérsiu no Indústria, Nino Pereira, partisipa iha Retiru Ministrus Ekonomia Asosiasaun Nasoins Sudeste Aziátiku (ASEAN) nian ba da-31, ne’ebé hala’o entre loron 26 no 28 fulan-fevereiru tinan 2025, iha sidade Johor, Malázia.
Edisaun tinan ida-ne’e hala’o iha prezidénsia rotativa Malázia nian, ne’ebé lidera ASEAN iha tinan 2025 ho tema “Inkluzividade no Sustentabilidade”, hodi foka-liu ba promosaun kreximentu ekonómiku inkluzivu no reziliente. Objetivu mak atu garante katak Estadu-membru hotu-hotu hetan benefísiu hosi prosperidade ne'ebé partilla, iha tempu hanesan hametin kapasidade rejiaun nian hodi hasoru dezafiu globál sira.
Iha sorumutu ne’e, Ministrus Ekonomia ASEAN nian diskute kona-ba asuntu prioridade sira hanesan atualizasaun ba prosesu negosiasaun ba Akordu Komérsiu Beins ASEAN (ATIGA, akrónimu iha lian inglés), progresu iha implementasaun Akordu Ekonomia Dijitál ASEAN (ASEAN DEFA), integrasaun Timor-Leste iha organizasaun, prioridade sira hosi prezidénsia malaia no planu estratéjiku Pilár Ekonómiku nian ba períodu tinan 2026 to’o 2030, iha kuadru Vizaun Komunidade ASEAN nian ba tinan 2045.
Reprezenta Timor-Leste, Ministru Nino Pereira destaka kompromisu país nian hodi kumpre kritériu sira adezaun nian, liuliu iha Pilár Ekonómiku, hodi reafirma kompromisu nasionál ba prinsípiu ASEAN nian no ba hametin kooperasaun rejionál. Durante sorumutu ne’e, governante timoroan ne’e hasoru malu ho Sekretáriu-Jerál ASEAN nian, Kao Kim Hourn, ne'ebé ho nia troka hanoin kona-ba pasu sira tuirmai iha prosesu adezaun Timor-Leste nian. Tuir Nino Pereira, “diálogu ne’ebé nakloke no konstrutivu ho Sekretariadu ASEAN hametin ita-nia determinasaun atu halo Timor-Leste sai membru ida ne’ebé efetivu no ativu iha komunidade rejionál.”
Ministru hala’o mós sorumutu bilaterál ida ho Ministru Investimentu, Komérsiu no Indústria Malázia nian, Tengku Zafrul Tengku Abdul Aziz, iha ne’ebé sira ko’alia kona-ba prioridades hosi prezidénsia malaia nian iha apoiu ba adezaun Timor-Leste nian. Governante malaiu ne’e garante katak “Malázia sei kontinua fó apoiu polítiku no tékniku ba Timor-Leste atu nune’e bele integra plenamente ba ASEAN iha tinan 2025.”
