Governu Timor-Leste

Primeiru-Ministru Kay Rala Xanana Gusmão prezide serimónia lansamentu aplikasaun móvel Institutu Nasionál Seguransa Sosiál (INSS), iha loron 8 fulan-abríl tinan 2025, ne’ebé hala’o iha salaun multiuzu GMN, Dili. Ferramenta dijitál foun ne’e ho objetivu atu hakbesik servisu seguransa sosiál nian ba sidadaun sira, hodi permite asesu simples no diretu ba informasaun pesoál no kontributiva oioin. 

Iha eventu ne’e hetan partisipasaun husi Ministra Solidariedade Sosiál no Inkluzaun, Verônica das Dores, Vise-Ministra, Céu Brites, no Prezidente Konsellu Administrasaun INSS, Arlindo Pinto, nune’e mós membrus Governu no reprezentante entidade públika no privada sira seluk. 

Iha nia diskursu, Primeiru-Ministru subliña importánsia hosi inovasaun ida-ne’e ba traballadór sira iha setór públiku no privadu, hodi konsidera katak ida-ne’e “hanesan loron ida ne’ebé importante, liuliu ba sira ne’ebé kontribui ba seguransa sosiál”. Nia destaka mós katak inisiativa sira hanesan ne’e permite “lori prestasaun servisus besik ba ema ida-idak”, hodi nune’e traballadór sira iha instituisaun públika no privada sira “bele iha garantia ba sira-nia futuru”. 

Aplikasaun INSS Mobile permite utilizadór sira atu konsulta, ho maneira simples no fasil, informasaun kona-ba sira-nia situasaun kontribuisaun, karreira profisionál, prestasaun ne'ebé fó, karteira kontributiva no simula valór estimadu hosi sira-nia pensaun reforma. Aplikasaun ne'e iha tempu badak sei disponivel ba download gratuita iha Play Store (Android) no App Store (iOS) no bele mós download liuhosi ligasaun tuirmai:https://api.segurancasocial.gov.tl/uploads/app_arm64_v8a_release_27e936adfa.apk 

Prezidente Konsellu Administrasaun INSS, Arlindo Pinto, destaka katak aplikasaun ne’e nu’udar pasu signifikativu ida iha dijitalizasaun servisus nian, no subliña katak ferramenta ida-ne’e permite “hadi’a prestasaun servisus públikus nian, nune’e mós efikásia no efisiénsia ba ita-nia sidadaun sira ne’ebé kontribui ona ba seguransa sosiál”.

Lansamentu hosi aplikasaun móvel ne'e tuir inisiativa sira seluk ne'ebé implementa hosi Ministériu Solidariedade Sosiál no Inkluzaun iha tinan ikus ne'e, hanesan kria Portál Seguransa Sosiál no emite kartaun seguransa sosiál ba kontribuinte sira hotu. Governu mós halo revizaun ba sistema pagamentu prestasaun sosiál ba ferik-katuas sira, hodi garante prosimidade, desentralizasaun no seleridade di’ak liu, ho pagamentu sira ne’ebé halo ho regulár liu iha nivel suku nian. 

Ho aplikasaun foun ida-ne’e, Governu reafirma nia kompromisu atu moderniza administrasaun públika no promove transparénsia no efisiénsia ida ne’ebé boot-liu iha jestaun seguransa sosiál, hodi kontribui ba konstrusaun sistema ida ne’ebé asesivel, inkluzivu no sustentável liu ba sidadaun hotu-hotu.