Vise-Primeiru-Ministru Francisco Kalbuadi Lay Aprezenta Prioridade Ekonómika Iha Edisaun Foun “Página do Governo”
Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha loron 8 fulan-abríl tinan 2025 dadeer, partisipa iha gravasaun epizódiu foun ida iha programa “Página do Governo”, inisiativa komunikasaun institusionál ida ne’ebé hakarak hametin diálogu diretu entre Ezekutivu no populasaun. Epizódiu ne’e, iha tempu badak sei fó-sai iha Rádiu no Televizaun Timor-Leste (RTTL) no publika iha plataforma dijitál sira Governu nian, foka liu ba prioridade estratéjiku sira Governu nian iha área ekonomia no importánsia koordenasaun interministeriál hodi promove kreximentu ida ne’ebé sustentável. 
Durante entrevista, Vise-Primeiru-Ministru aprezenta vizaun globál husi nia mandatu, ne’ebé destaka kriasaun empregu, diversifikasaun ekonomia no atrai investimentu estranjeiru nu’udar prioridade prinsipál sira. Nia subliña mós progresu sira ne'ebé atinje ona iha setór turizmu, agrikultura, peskas no ekonomia azúl, konsidera hanesan pilár fundamentál sira hosi estratéjia dezenvolvimentu ekonómiku nasionál. 
Iha ezersísiu husi nia knaar nu’udar Ministru Koordenadór Asuntus Ekonómikus, Francisco Kalbuadi Lay esplika ninia papél iha artikulasaun no armonizasaun polítika públika hosi setór produtivu oioin, hodi defende abordajen integrada ida ne’ebé permite efikásia boot-liu iha ezekusaun programa no projetu sira iha territóriu nasionál tomak. Governante ne’e mós realsa relevánsia hosi estabilidade makroekonómika no modernizasaun hosi ambiente negósiu nian hanesan kondisaun esensiál sira atu hasa'e setór privadu no hametin kompetitividade ekonomia timoroan nian. 
Ministru aborda mós rezultadu husi vizita ofisiál foin lalais ne’e ba país parseiru sira, hodi refere ba akordu sira ne’ebé asina ona iha área komérsiu, investimentu no kooperasaun téknika nu’udar instrumentu konkretu atu hasa’e ekonomia nasionál no hametin pozisaun Timor-Leste nian iha nivel rejionál no internasionál. Nia destaka mós adezaun foin lalais ne’e ba Organizasaun Mundiál Komérsiu (OMK) no prosesu integrasaun plena iha ASEAN ne’ebé la’o hela.
Programa “Página do Governo” ne’e promove hosi Ministru Prezidénsia Konsellu Ministrus no Portavós Governu, Agio Pereira, ne’ebé parseria ho RTTL. Iha Nélia Chaves hanesan aprezentadora, Ika Moniz hanesan produtora ezekutiva no hetan apoiu tékniku hosi ekipa mídia Gabinete Primeiru-Ministru, Gabinete Portavós Governu no Gabinete hosi membru Governu ne'ebé hetan entrevista. 
Plataforma ida-ne’e ho objetivu atu reforsa transparénsia no prosimidade entre Governu no sidadaun sira, hodi permite populasaun atu akompaña, ho dalan asesivel no informadu, desizaun prinsipál sira no polítika públika sira ne’ebé la’o hela. 
