Entrega Ambulánsia Tolu Ba Munisípiu Manatutu iha Ámbitu Kooperasaun Ho Provínsia Hunan, Xina
Governu Provínsia Hunan, Repúblika Populár Xina, kinta-feira ida-ne’e, loron 3 fulan-abríl 2025, liuhosi Reprezentante Embaixadór Xina nian iha Timor-Leste, ofisialmente entrega ambulánsia tolu ba Munisípiu Manatutu. Serimónia ne’e hala’o iha instalasaun Ministériu Administrasaun Estatál nian, ne’ebé viatura sira ne’e simu hosi Ministru Administrasaun Estatál, Tomás do Rosário Cabral. 
Hafoin resesaun formál, ambulánsia ida entrega ona ba Ministériu Saúde, no simu diretamente husi Ministra Saúde, Elia A.A. dos Reis Amaral. Restu unidade rua seluk entrega ba Autoridade Munisipál Manatutu, ne’ebé reprezenta husi Prezidente Luís Fernandes.
Entrega ambulánsia sira-ne'e kumpre kompromisu ne'ebé maka Governu Provínsia Hunan nian halo durante Vise-Governadór Zhang Jian Fei nia vizita bá Manatutu iha loron 4 no 5 fulan-maiu tinan 2024, bainhira selebra aniversáriu parseria amizade entre Hunan no Manatutu ba dala sanulu. Doasaun ida-ne’e ho objetivu atu haforsa munisípiu nia kapasidade resposta nian, no kontribui hodi reforsa sistema saúde lokál. 
Durante ninia diskursu, Ministru Administrasaun Estatál husu ba entidade kompetente sira atu halo jestaun ida ne’ebé responsavel ba rekursus ne’ebé simu no agradese ba kooperasaun ne’ebé estabelese ona ho Provínsia Xina Hunan, no espresa ninia intensaun atu habelar parseria ne’e ba munisípiu sira seluk, atubele kontribui hodi promove moris-di’ak populasaun nian.
Relasaun amizade entre Hunan no Manatutu hahú kedas iha tinan 2014, bainhira Primeiru-Ministru Kay Rala Xanana Gusmão, ofisialmente, hili Provínsia Hunan nu’udar parseiru ba Autoridade Munisipál Manatutu. Iha tinan tuirmai, atuál Ministru Tomás do Rosário Cabral, iha tempu ne’ebá hanesan Vise-Ministru Administrasaun Estatál, asina karta intensaun ida ho objetivu atu selebra memorandu entendimentu ida. Akordu ne’e formaliza iha tinan 2019, ho asinatura memorandu kooperasaun amizade nian ida entre parte rua ne’e, ne’ebé foka hodi promove dezenvolvimentu iha área agrikultura, edukasaun, siénsia, teknolojia no interkámbiu kulturál. 
Serimónia entrega ambulánsias nian, hahú ho vizita ofisiál ida hosi Ministru Administrasaun Estatál ba Hunan iha loron 25 fulan-Outubru tinan 2024, iha ne'ebé Vise-Governadora Zhang Yingchun formaliza doasaun ne'e hodi Governu Provinsiál nia naran.
