Programa “Página do Governo” ho MPIE aban iha RTTL no iha media sosiál tuku 8 kalan

Kin. 03 abril 2025, 16:39h
WhatsApp Image 2025-03-17 at 11.50.52

IX Governu Konstitusionál anunsia katak aban, loron 4 fulan-abril tinan 2025 sei hala’o transmisaun epizódiu datoluk hosi programa talkshow  “Página do Governo”, ne’ebé sei transmite, iha Rádiu no Televizaun Timor-Leste (RTTL) no media ofisiál sira Governu nian. Iha edisaun datoluk ne’e, konvidadu maka Ministru Planeamentu no Investimentu Estratéjiku, Gastão Francisco de Sousa, ne’ebé ko’alia kona-ba kestaun sira relasiona ho dezenvolvimentu ekonómiku no sosiál, infraestrutura estratéjika no investimentu sustentável iha país ne’e.

Durante entrevista ne’e, Ministru Gastão Francisco de Sousa destaka prioridade sira hosi ninia ministériu ba promosaun dezenvolvimentu ekonómiku no sosiál, nune’e mós ezekusaun infraestrutura estratéjika sira ne’ebé la’o hela, no subliña ninia impaktu hodi hadi’a kondisaun moris populasaun sira-nian no kreximentu ekonómiku. WhatsApp Image 2025-03-17 at 11.50.49

Transparénsia no jestaun di’ak ba rekursu públiku ne’ebé destina ba projetu dezenvolvimentu sira mós iha hela análize, liuliu atensaun ba papél Komisaun Nasionál Aprovizionamentu nian iha fiskalizasaun no auditoria infraestrutura, atu nune’e bele prevene irregularidade no promove integridade iha ezekusaun projetu. Diskute mós kona-ba mekanizmu koordenasaun entre Ajénsia Dezenvolvimentu Nasionál no Ministériu Obras Públikas atu asegura efisiénsia boot-liu iha ezekusaun obra sira.

Ministru salienta mós papél hosi Fundu Kapitál Umanu ba Dezenvolvimentu iha kapasitasaun rekursus umanus iha Timor-Leste, hodi fó detallu kona-ba inisiativa prioridade sira ne’ebé finansia hosi fundu ida-ne’e no nia kontribuisaun ba dezenvolvimentu profisionál no edukasionál populasaun nian. WhatsApp Image 2025-03-17 at 11.50.51

Iha nia intervensaun ikus, Ministru Gastão Francisco de Sousa fahe vizaun estratéjiku husi ninia ministériu ba futuru país nian, hodi destaka esforsu Governu hodi implementa reforma no investimentu estruturál sira ne’ebé ho objetivu atu asegura dezenvolvimentu sustentável no inkluzivu.

 “Página do Governo” hanesan espasu komunikasaun institusionál ida ne’ebé reforsa transparénsia no prestasaun kontas kona-ba polítika no programa governu nian, ne’ebé permite populasaun atu akompaña, ho forma klaru no objetivu Ezekutivu nia asaun sira.

Talk show ida-ne’e, inisiativa ida ne’ebé lidera husi Ministru Prezidénsia Konsellu Ministrus no Portavós Governu, Agio Pereira, ne’ebé kolabora ho Rádiu no Televizaun Timor-Leste (RTTL), ho Nélia Chaves nu’udar aprezentadora no Ika Moniz nu’udar produtora ezekutiva, no filma  husi RTTL no hetan apoiu tékniku husi ekipa mídia Gabinete Primeiru-Ministru, Gabinete Porta-vos Governu, Prezidénsia Konsellu Ministrus no gabinete  hosi governante ne’ebé hetan entrevista.

 

   Ba leten