Parlamentu Nasionál Aprova Lei Foun kona-ba Enkuadramentu Orsamentál no Jestaun Finanseira Públika
Iha loron 1 fulan-abríl tinan 2025, iha sesaun plenária ordinária, Parlamentu Nasionál aprova Proposta Lei n. 14/VI(2ª) – Enkuadramentu Orsamentu Jerál Estadu no Jestaun Finanseira Públika, ho votu afavór 38, kontra 1 no abstensaun 19. Diploma ne’e, aprezenta hosi Governu liuhosi Ministériu Finansas, substitui Lei anteriór n. 2/2022, loron 10 fulan-fevereiru no halo parte iha Reforma Jestaun Finansas Públikas, ne’ebé prevee ona iha Programa Governu Konstitusionál da-9 nian.
Lei foun ne’e ho objetivu atu hametin efisiénsia, transparénsia no dixiplina iha jestaun finanseira públika liuhosi introdús mekanizmu sira ne’ebé hadi’a planeamentu orsamentál, aliñamentu entre orsamentu no planeamentu estratéjiku, no mós prestasaun kontas. Inovasaun prinsipál sira inklui introdusaun ba deklarasaun estratéjia orsamentál, limitasaun ba entidade sira ne’ebé hetan autorizasaun atu foti empréstimu, eskluzaun ba saldu orsamentál sira hosi entidade sira ne’ebé laiha autonomia finanseira no reforsu orsamentasaun bazeia ba programa ne’ebé foka ba rezultadu konkretu sira.
Iha nia diskursu hafoin votasaun, Ministra Finansas, Santina José Rodrigues F. Viegas Cardoso subliña importánsia hosi prosesu diskusaun ho Parlamentu Nasionál, tantu iha jeneralidade no mós espesialidade, hodi subliña katak "pedidu sira esklaresimentu nian ne'ebé aprezenta hosi Deputadu sira, liuliu hosi bankada opozisaun nian, kontribui ba hadi'a diploma ida-ne'e". Ministra hatutan mós katak "Governu sei kontinua depende ba apoiu hosi Parlamentu iha implementasaun hosi Lei ida-ne'e, nune'e mós iha análize hosi Orsamentu Jerál Estadu 2026 no Konta Jerál Estadu 2024, rua ne'e prepara hela bazeia ba enkuadramentu legál foun ida-ne'e".
Hafoin hetan aprovasaun iha votasaun jerál finál, Komisaun C sei kontinua ho redasaun finál ba diploma molok haruka ba Prezidente Repúblika hodi promulga no publika iha Jornál Repúblika.
Sesaun plenária ne’e prezide husi Prezidente Parlamentu Nasionál, Maria Fernanda Lay, no aleinde Ministra Finansas, partisipa mós husi Vise-Ministra Finansas, Felícia Claudinanda Cruz Carvalho, no Vise Ministru Asuntus Parlamentares, Adérito Hugo da Costa.
