Ministru Administrasaun Estatál akompaña reforsu governasaun lokál iha munisípiu Aileu, Manufahi no Vikeke
Ministru Administrasaun Estatál, Tomás do Rosário Cabral, konklui servisu semana ida nian iha munisípiu Aileu, Manufahi no Vikeke, iha ne’ebé prezide serimónia oioin simu pose husi xefe suku sira no akompaña progresu obra importante sira hodi reforsa governasaun lokál.
Iha Vikeke, Ministru halo inaugurasaun ba edifísiu foun Administrasaun Postu Administrativu Osú nian, ne’ebé akompaña husi Prezidente Autoridade Munisipál, Francisco Cruz Simões de Gonzaga Soares. Iha okaziaun ne'e, destaka importánsia hosi edifísiu foun hodi halo atendimentu públiku sira besik liu ba populasaun no husu atu kuda ai-horis iha fatin refere hodi prevene erozaun. Nia mós subliña presiza atu hadi’a edifísiu antigu administrasaun, ne'ebé klasifika hanesan patrimóniu períodu koloniál portugés nian. “Fatin ne’ebá ita hotu nian no ba Estadu nian, atu serbí Unidade Administrativa ida-ne’e, nune’e ema bele hetan asesu servisu ho fasil liután no servisu sira ne’e besik liu ba populasaun”, nia afirma
Durante vizita ba Osú, Ministru mós observa fatin ba futuru Kapela Nossa Senhora da Rainha do Rosário, ne’ebé iha hela konstrusaun ho finansiamentu husi Programa Nasionál Dezenvolvimentu Suku (PNDS), ho orsamentu dolar rihun 62 ba tinan fiskál 2024 nian. Nia vizita mós obra ba Kapela Maria Auxiliadora iha Suku Builo, hodi destaka importánsia hosi espasu sira-ne’e, nu’udar sentru relijiozu no komunitáriu ne’ebé hametin estrutura sosiál iha área rurál no remota sira.
Nafatin iha Vikeke, Tomás do Rosário Cabral ofisialmente inaugura rezidénsia Prezidente Autoridade Munisipál, ne’ebé lokaliza iha Postu Administrativu Vikeke Vila, no prezide serimónia simu pose husi xefe Suku Macadique de Baixo no Macadique Uaitame, iha Postu Administrativu Uatulari nian. Iha eventu hanesan, distribui komputadór no fotografia ofisiál órgaun soberania nian ba lider foun sira, hanesan forma ida hosi apoiu institusionál hodi hahú sira-nia mandatu.
Durante serimónia ne’e, Ministru reafirma kompromisu Governu nian ba desentralizasaun administrativa no polítika, hodi hateten katak “Governu aprova rezolusaun ida atu nune’e, hafoin eleisaun prezidensiál tinan 2027, bele iha Governu Lokál ida ho orsamentu permanente no direitus polítikus, nune’e servisus públiku besik liu ba populasaun no desizaun sira la bele depende de’it ba governu sentrál”.
Iha munisípiu Aileu, Ministru halo observasaun ba rai ne’ebé destinadu ba futuru edifísiu Balkaun Úniku, ne’ebé akompaña husi Prezidente Autoridade Munisipál, João Bosco dos Santos. Nia subliña katak sentru atendimentu públiku ida-ne’e ho objetivu atu presta servisu ho maneira ida ne’ebé efisiente, transparente no asesivel, hodi hametin kapasidade administrativa lokál. Nafatin iha Aileu, nia prezide serimónia fó pose ba xefe Suku Karahili no Hurai-Raco, hamutuk ho Sekretárius Estadu Dezenvolvimentu Lokál no Formasaun Profisionál no Empregu. Ministru husu ba lider foun sira atu fó onra ba kompromisu ne’ebé sira halo ona ba sira-nia komunidade, hodi subliña katak “povu hein solusaun no lideransa husi imi atu promove bein-komún no dezenvolvimentu ho estabilidade no dame”.
Iha Manufahi, iha loron 25 fulan-marsu, Ministru prezide serimónia fó pose ba xefe Suku Tahu-Bein, iha Postu Administrativu Alas, akompaña husi Prezidente Autoridade Munisipál, Luís Marçal da Costa Tavares. Iha ninia intervensaun, nia reforsa importánsia hosi governu lokál ida ne’ebé funsionál no organizadu ho di’ak, hodi reafirma katak “administrasaun lokál ne’e efetivu bainhira artikula ho servisu munisipál sira no hetan apoiu hosi estrutura sentrál ida ne’ebé iha kompromisu ba dezenvolvimentu”.
Durante semana tomak, serimónia sira ne’e hetan prezensa hosi reprezentantes Governu, autoridades relijioza no tradisionál, responsavel sira hosi servisu munisipál, forsas seguransa, membrus sosiedade sivíl no komunidade lokál, ne’ebé destaka envolvimentu hamutuk iha konsolidasaun podér lokál no desentralizasaun iha Timor-Leste.
