Komandante-Jerál GNR Vizita Timor-Leste Iha Okaziaun Aniversáriu PNTL ba dala 25
Iha tersa-feira, loron 25 fulan-marsu tinan 2025, Primeiru-Ministru, Kay Rala Xanana Gusmão, hala’o sorumutu ho Tenente-Jenerál, Rui Alberto Ribeiro Veloso, Komandante-Jerál hosi Guarda Nasionál Republikana (GNR) Portugál nian, iha Palásiu Governu, iha ámbitu vizita ofisiál responsavel ida-ne’e nian mai Timor-Leste, iha okaziaun selebrasaun aniversáriu Polísia Nasionál Timor-Leste (PNTL) ba dala 25 no tinan 25 prezensa GNR nian iha país ne’e. 
Iha sorumutu ne’e, ko’alia kona-ba área interese oioin ne’ebé atu hametin kooperasaun bilaterál, liuliu hanesan polisiamentu komunitáriu, seguransa rodoviária, kontrolu fronteira no kombate krime transnasionál. Primeiru-Ministru destaka kontribuisaun GNR nian iha tinan 25 ikus ne’e, ne’ebé subliña importánsia atu kontinua parseria ida-ne’e hodi apoia kapasitasaun institusionál PNTL nian. 
Hafoin sorumutu ne’e, Tenente-Jenerál Rui Alberto Ribeiro Veloso, reafirma ba jornalista sira kompromisu GNR nian atu kontinua kolabora ho autoridade timoroan sira. “GNR iha Timór dezde inísiu no sei prontu nafatin atu kolabora iha futuru. Ami ajuda PNTL atu hadi’a nia kapasidade intervensaun no polisiamentu. Ne’e forsa polísia ida ne’ebé dezenvolve ona no sempre buka atu hadi’a, hodi besik liu ba populasaun”, nia deklara. 
Iha okaziaun ne’e, Ministru Interiór, Francisco da Costa Guterres, lori Governu Timor-Leste nia naran, agradese ba apoiu ne’ebé GNR halo ona no reafirma interese atu mantein no aprofunda kolaborasaun ida-ne’e. Marka mós prezensa iha sorumutu ne’e, Embaixadora Portugál iha Timor-Leste, Manuela Bairos.
Vizita hosi Komandante-Jerál Rui Veloso inklui mós sorumutu sira ho Xefe Estadu, José Ramos-Horta, ho Komandante-Jerál PNTL, Henrique da Costa, ho militár portugés sira ne’ebé destakadu iha país ne’e, no partisipasaun iha serimónia komemorasaun ba tinan 25 kriasaun PNTL nian, iha ne’ebé hetan kondekorasaun ho grau Insígnia Orden Timor-Leste nian. 
Prezensa GNR nian iha Timor-Leste hahú iha tinan 2000, iha ámbitu hosi misaun manutensaun pás nian, no evolui ba kooperasaun tékniku-polisiál ida ne’ebé formaliza iha tinan 2009. Hahú hosi ne’ebá, nia kontribui ona ba dezenvolvimentu kapasidade instituisaun nasionál nian iha área seguransa públika.
