Governu Timor-Leste

Governu Konstitusionál IX felisita aniversáriu Polísia Nasionál Timor-Leste (PNTL) nian ba da-25, ne’ebé selebra ohin, loron 27 fulan-marsu tinan 2025, ho serimónia ofisiál ida iha Palásiu Governu, ho lema “Hamutuk, Ita Hametin Konfiansa”. 

Iha nia diskursu, Primeiru-Ministru, Kay Rala Xanana Gusmão, elojia kna’ar PNTL nian nu’udar “instituisaun fundamentál ba seguransa no estabilidade país”, no hateten katak, hanesan “orgullu no onra ida atu selebra hamutuk ho ita-boot sira Aniversáriu Polísia Nasionál Timor-Leste nian ba da-25”. Xefe Governu ne’e destaka importánsia atu rekoñese no agradese “profisionalizmu no dedikasaun ba povu timoroan” hosi ajentes Polísia Nasionál, hodi subliña transformasaun instituisaun ne’e iha tinan hirak nia laran: "Polísia Nasionál moris hosi ahi-kadesan hodi sai hanesan ohin loron ne’e: pilár fundamentál demokrasia nian ida ne’ebé serbí ba povu". 

Durante serimónia, anunsia formalmente promosaun ba ajente korporasaun na’in-2.763 liu, iha prosesu ida ne’ebé, tuir Primeiru-Ministru, “hatudu esforsu nasionál ida ne’ebé nunka akontese antes ne’e, hodi transforma ho kle’an estrutura PNTL nian”. Nia destaka mós katak, promosaun hotu-hotu ne’ebé hala’o bazeia ba “kritériu rigorozu, supervizaun hosi komisaun independente ida hosi kualkér influénsia ho karater polítika ka sosiál”, hodi fó onra ba “servisu oioin sira ba nasaun, inklui antiguidade no esperiénsia, partisipasaun iha luta ba independénsia no lealdade institusionál durante krize 2006-2008”. 

Primeiru-Ministru espresa konfiansa katak “loron ohin la’ós marka konkluzaun husi prosesu ida, maibé inísiu era foun ida ba PNTL”, tuir melloria iha nivel planeamentu, formasaun no jestaun rekursus. Nia mós husu atu Polísia besik liu ba sidadaun sira, no hateten katak “país presiza la’ós de’it atu PNTL promove sidadaun sira-nia moris di’ak, maibé, liuliu, atu hakbesik ba sidadaun timoroan no sira ne’ebé, la’ós timoroan, ne’ebé hela iha ita-nia país”. 

Subliña importánsia hosi kooperasaun institusionál, nia reforsa katak “kapasidade PNTL no seguransa nasionál rasik depende ba koordenasaun esforsu Estadu, Governu no Forsa Defeza no Seguransa nian, tuir Lei no Konstituisaun”, no hatutan tan katak “ohin ita mós selebra lasu kooperasaun istóriku hirak ne’ebé permite ona ita hodi dezenvolve no kapasita ita-nia polísia sira”. Nia remata ho apelu ida ba kompromisu kontínuu: “Diviza sira ne’ebé ohin simu la’ós de’it símbolu rekoñesimentu ba pasadu, maibé kompromisus ba futuru ida ne’ebé iha exelénsia, integridade, dixiplina no dedikasaun ba povu timoroan”. 

Selebrasaun aniversáriu PNTL ba da-25 ne’e inklui mós, iha loron 11 fulan-marsu, hala’o Semináriu Nasionál ida iha Auditóriu Sentru Formasaun Polísia nian, no, iha loron 26 fulan-marsu dadeer, misa Agradesimentu ida iha Kapela Santo António no omenajen ida iha Monumento dos Mártires da PNTL, iha Jardim dos Heróis e Mártires da Pátria. Iha serimónia loron 27 ne’e entrega sertifikadu louvór no kondekorasaun ba komandante no membru PNTL sira, no taka programa selebrasaun ho almosu konfraternizasaun iha Centro de Convenções de Díli (CCD). 

Portavós Governu, Ministru Agio Pereira hateten: “Iha lema ‘Hamutuk, Ita Hametin Konfiansa’, ita la’ós de’it selebra istória PNTL nian, maibé mós kompromisu koletivu entre Polísia, Estadu no povu timoroan. Konfiansa mútua ida-ne’e maka sai baze ba seguransa públika no konsolida ita-nia demokrasia”.