Edisaun Foun husi “Página do Governo” Destaka Polítika Dezenvolvimentu Sosiál no Rurál
Iha loron 21 fulan-marsu tinan 2025, programa “Página do Governo” hetan partisipasaun husi Vise-Primeiru-Ministru, Ministru Koordenadór Asuntus Sosias no Ministru Dezenvolvimentu Rurál no Abitasaun Komunitária, Mariano Assanami Sabino. Durante gravasaun ba epizódiu ida-ne’e, ne’ebé sei transmite iha tempu badak iha Rádiu no Televizaun Timor-Leste (RTTL) no iha rede sosiál sira, aborda temas ne’ebé relasiona ho dezenvolvimentu sosiál no rurál, ho foku ba promosaun polítikas integradas ba moris-di’ak populasaun nian. 
Durante entrevista, Vise-Primeiru-Ministru fahe vizaun estratéjika hosi ninia mandatu, hodi destaka ninia prioridade sira no abordajen integrada entre polítikas sosiais no dezenvolvimentu rurál, ho objetivu atu promove transformasaun ida ne’ebé sustentável iha territóriu nasionál tomak. Mariano Assanami Sabino subliña katak, ho aliñamentu hosi polítika hirak-ne’e, Governu iha ona kompromisu atu promove moris-di’ak populasaun nian no garante futuru ida ne’ebé justu no sustentável liu ba jerasaun sira iha futuru.
Programa ne’e ko’alia mós kona-ba artikulasaun interministeriál, ho Vise-Primeiru-Ministru esplika oinsá, nu’udar Ministru Koordenadór Asuntus Sosiais, nia koordena servisu sira hosi ministériu oioin no parseiru dezenvolvimentu sira hodi promove abordajen ida ne’ebé integradu no efikás iha formulasaun no implementasaun polítikas sosiais. Hatán ba kestaun sira kona-ba monitorizasaun no avaliasaun ba polítikas públikas, Vise-Primeiru-Ministru fó sai detallu kona-ba mekanizmus no indikadores ne’ebé uza hodi garante transparénsia no responsabilidade iha jestaun ba polítika sira-ne’e, atu nune’e bele asegura katak rezultadu sira ne’e hatán ba nesesidades reais populasaun nian. 
Governante ne’e mós esplika kona-ba estratéjias hodi promove dezenvolvimentu sustentável, liuliu iha áreas krítikas hanesan kombate ba “stunting” (mal-nutrisaun infantíl). Mariano Assanami Sabino reafirma kompromisu Governu nian hodi kombate inseguransa ai-han no mal-nutrisaun, ho destaka implementasaun planus nasionais hanesan Planu Estratéjiku Dezenvolvimentu tinan 2011-2030 no Planu Nasionál Multisetoriál ba Kombate ‘Stunting’ (2024-2030). Nia salienta mós importánsia atu hametin parserias, adota solusoins inovadoras no serbisu iha koordenasaun ho parte hotu ne'ebé envolve hodi alkansa objetivu sira-ne'e. 
Iha área dezenvolvimentu rurál no abitasaun komunitária, Mariano Assanami Sabino mensiona inisiativa sira ne’ebé la’o hela atu hadi’a kondisaun abitasaun iha área rurál sira, hanesan Programa “Uma Dignu”, hodi destaka kolaborasaun entre ministériu no entidade lokál sira atu alkansa objetivu sira-ne’e.
Ministru ko’alia mós supervizaun ba entidade sira ne’ebé iha ninia supervizaun, hanesan Gabinete Apoiu ba Sosiedade Sivíl, INCSIDA (Instituto Nacional para o Combate à Sida), INDDICA (Instituto para a Defesa dos Direitos da Criança) no Unidade Misaun ba Kombate Stunting. Nia esplika oinsá instituisaun oioin kolabora hodi garante rezultadu sira ne'ebé efetivu no abordajen ida ne’ebé koordenada iha implementasaun polítika públika sira. 
Iha konkluzaun programa ne’e, Vise-Primeiru-Ministru fahe ninia vizaun ba futuru páis nian, iha ne’ebé destaka kompromisu Governu nian ba dezenvolvimentu sustentável no inkluzaun sosiál. Ministru fó énfaze ba importánsia atu kontinua integra polítika atuál no futuru hodi garante katak objetivu sira ba tempu naruk nian bele alkansa, ho foku ida atu hadi’a liután populasaun nia kondisaun moris no promove ekidade.
“Página do Governo” funsiona hanesan plataforma ida ba diálogu transparente entre Governu no populasaun, hodi permite sidadaun sira atu akompaña ho klaru asaun no avansu sira iha polítika públika sira.
Inisiativa ida-ne’e, promove hosi Ministru Prezidénsia Konsellu Ministrus no Porta-vós Governu, Agio Pereira, iha parseria ho RTTL, ho Nélia Chaves hanesan aprezentadora no Ika Moniz hanesan produtora ezekutiva, no apoiu tékniku hosi ekipa mídia sira hosi Gabinete Primeiru-Ministru, Gabinete Portavós Governu hosi Prezidénsia Konsellu Ministrus no membru Governu entrevistadu.
Fó-hanoin katak ohin, 21 fulan-marsu 2025, tuku 8 kalan, sei transmite iha RTTL no rede sosiál sira, epizódiu daruak hosi “Página do Governo”, ho partisipasaun husi Ministru Administrasaun Estatál.
Governu konvida sidadaun hotu-hotu atu asiste programa no partisipa ativu iha espasu prestasaun kontas no diálogu nian ida-ne’e.
