Governu no ASEAN University Network Realiza Konferénsia Internasionál kona-ba Garantia Kualidade no Exelénsia Akadémika
Primeiru-Ministru, Kay Rala Xanana Gusmão, prezide serimónia abertura ba Konferénsia Internasionál Rede Universidade ASEAN nian, ne’ebé koñesida ho ASEAN University Network (AUN), ne’ebé hala’o iha loron 18 fulan-marsu tinan 2025, iha Dili. 
Eventu ne’e, ho tema “Garantia Kualidade no Exelénsia Akadémika iha Timor-Leste”, organiza husi Ministériu Ensinu Superiór, Siénsia no Kultura, ne’ebé lidera husi José Honório, serbisu hamutuk ho Vise-Ministra ba Asuntus ASEAN, Milena Maria da Costa Rangel. Konferénsia ne’e halibur peritu internasionál na’in-sanulu hosi nasaun membrus ASEAN nian, ho objetivu atu fó apoiu ba Timor-Leste hodi hametin ensinu superiór no fó rekoñesimentu ba kualifikasaun akadémika sira. 
Iha ninia diskursu abertura, Primeiru-Ministru destaka importánsia kualifikasaun rekursus umanus ba dezenvolvimentu sustentável nasaun nian. "Se ita hakarak kontribui ba dezenvolvimentu ida ne'ebé adekuadu, ita tenke garante katak ita-nia rekursus umanus iha kualifikasaun aas", nia afirma. Xefe Governu subliña mós katak setór ensinu superiór tenke hala’o papél ida ne’ebé determinante hodi kapasita estudante nasionál sira, fó ba sira ferramenta ne’ebé nesesáriu atu bele kompete iha merkadu traballu nasionál, rejionál no internasionál. 
Ministru Ensinu Superiór, Siénsia no Kultura, José Honório, hato’o nia agradesimentu ba Primeiru-Ministru ba nia kompromisu hodi valoriza ensinu superiór no reforsa importánsia hosi parseria ho ASEAN University Network atu hasa’e padraun kualidade akadémika iha Timor-Leste. "Ami fiar katak kooperasaun ida-ne'e sei kontribui maka'as ba hadi'a ami-nia instituisaun ensinu superiór sira, tau instituisaun sira tuir padraun internasionál", nia hatete.
Konferénsia ne’e halibur Reitór no Vise-Reitór sira hosi instituisaun ensinu superiór Timor-Leste nian, reprezentante sira hosi Ajénsia Nasionál ba Avaliasaun no Akreditasaun Akadémika (ANAAA, sigla iha lian portugés) no Institutu Nasionál Siénsia no Teknolojia (INCT, sigla iha lian portugés), nune’e mós espesialista sira seluk hosi setór ne’e. Sorumutu ne'e permite troka esperiénsia no diskusaun kona-ba estratéjia hodi hametin kualidade ensinu superiór nian iha nasaun ne’e no promove rekoñesimentu ba kualifikasaun akadémika timoroan sira nian iha nivel internasionál. 
Iha ámbitu prosesu adezaun plena Timor-Leste nian ba ASEAN, hametin instituisaun akadémika importante tebes atu akompaña dezafiu nasionál, rejionál no globál sira. Iha sentidu ida-ne’e, hosi realizasaun konferénsia ida-ne'e fó espasu ida hodi fahe koñesimentu no hametin kooperasaun ho universidade sira iha rejiaun ne’e.
