Governu Timor-Leste

Iha dader loron 19 fulan-marsu tinan 2025, realiza tan edisaun ida hosi gravasaun programa “Página do Governo”, iha ne’ebé, Sekretáriu Estadu Asuntus Toponímia no Organizasaun Urbana, Germano Santa Brites Dias, maka sai hanesan bainaka. Programa ne’e, sei transmite iha tempu badak iha Rádiu no Televizaun Timor-Leste (RTTL) no iha rede sosiál sira, ko’alia kona-ba tema importante sira ne’ebé relasiona ho kreximentu urbanu sustentável, dezafiu hosi urbanizasaun ne’ebé la ordenadu no medida sira reorganizasaun urbana nian iha Timor-Leste. 

Durante entrevista ne’e, Sekretáriu Estadu fahe rezultadu prinsipál sira husi ninia serbisu dezde Governu Konstitusionál da-9 simu pose, hodi destaka kompromisu kontínuu ba reordenamentu urbanu, liuliu tau atensaun iha Dili, no reforsa jestaun urbana iha rejiaun sira seluk iha país ne’e. Sekretáriu Estadu subliña katak, maski iha progresu, dezafiu sira sei iha nafatin, liuliu kona-ba kreximentu dezordenadu hosi área urbana sira no presiza atu promove dezenvolvimentu ne’ebé sustentável liután.

Programa ne’e mós fó sai detallu kona-ba inisiativa sira ne’ebé adota hela atu hamenus risku inundasaun, ne’ebé baibain iha área urbana sira iha rai-laran, liuliu iha zona sira ne’ebé bele sofre dezastres naturais. Hatán ba kestaun sira kona-ba mobilidade urbana, Sekretáriu Estadu aborda asaun sira ne'ebé la'o hela hodi hadi'a infraestrutura estrada-ponte no sirkulasaun tránzitu nian iha Dili, hodi temi kona-ba konstrusaun estrada foun sira no reorganizasaun espasu públiku nu'udar dalan hodi hamenus engarrafamentu no hadi'a populasaun sira-nia kondisaun moris. 

Parte signifikativu ida hosi konversa ne'e maka foka ba estratéjia sensibilizasaun populasaun nian, inklui inisiativa atu alerta kona-ba importánsia hodi la okupa área risku sira, liuliu iha zona sira ne'ebé vulneravel liu.

Sekretáriu Estadu diskute mós kona-ba polítika reordenamentu urbanu ne’ebé implementa iha sidade sira seluk, hodi destaka espesifisidade no dezafiu sira ne’ebé hasoru iha munisípiu sira ne’ebé dook liu hosi kapitál. Iha kontestu ida-ne’e, mensiona kona-ba kolaborasaun besik entre Sekretáriu Estadu, autoridade munisípiu no liña ministeriál sira seluk, hodi garante ezekusaun polítika públika ne’ebé efetivu iha territóriu nasionál tomak.

Iha konkluzaun ba programa ne’e, Sekretáriu Estadu trasa vizaun ida ba futuru sidade nasionál, hodi subliña kompromisu ba dezenvolvimentu urbanu ida ne’ebé organizadu, funsionál no reziliente ne'ebé fó benefísiu ba jerasaun sira iha futuru.

"Página do Governo" kontinua sai hanesan plataforma ida ba diálogu transparente, hodi permite ba populasaun atu akompaña Governu nia asaun no progresu sira iha área oioin, ho énfaze ba organizasaun urbana no dezenvolvimentu sustentável. 

Talk show ida-ne’e, lidera hosi Ministru Prezidénsia Konsellu Ministrus no Portavós Governu, Agio Pereira, ho Nélia Chaves nu’udar aprezentadora no Ika Moniz nu’udar produtora ezekutiva, konta ho apoiu tékniku hosi ekipa mídia sira hosi Gabinete Primeiru-Ministru, Gabinete Portavós Governu no Prezidénsia Konsellu Ministrus no membru Governu entrevistadu. Edisaun tuirmai, ho partisipasaun hosi Ministru Administrasaun Estatál, sei fó-sai iha loron 21 fulan-marsu tinan 2025.

Governu konvida sidadaun hotu-hotu atu asiste programa no partisipa ativu iha espasu transparénsia no prestasaun kontas ida-ne’e.