Governu Timor-Leste

Ministru Prezidénsia Konsellu Ministrus, Agio Pereira, akompaña hosi Diretór-Jerál Servisu Nasionál Intelijénsia, Longuinhos Monteiro, iha loron 13 fulan-marsu tinan 2025, hasoru malu ho delegasaun ida hosi Governu Austrália, ne’ebé lidera hosi Embaixador Austrália ba Asuntus Sibernétikus no Teknolojia Krítika, Brendan Dowling no Embaixadora Austrália iha Timor-Leste, Caitlin Wilson, hodi diskute kona-ba hametin kooperasaun bilaterál iha área siberseguransa nian. Embaixadór Brendan Dowling koordena Austrália nia inisiativa sira iha siberseguransa no teknolojia krítika, hodi promove kolaborasaun internasionál atu hasoru dezafius ne'ebé mosu iha área ida-ne'e. 

Enkontru ne’e foka liu ba dezafiu sira ne’ebé mosu iha área siberseguransa nian, liu-liu riskus ne’ebé asosiadu ho ligasaun kabu submarinu foun, nune’e mós oportunidades ba kolaborasaun téknika hodi hametin reziliénsia dijitál iha Timor-Leste. Entre inisiativa sira ne'ebé diskute mak identifika vulnerabilidades, reforsa koordenasaun interinstitusionál no realiza ezersísius siberseguransa nian hodi koko kapasidade resposta nasionál ba ameasa sibernétika. 

Ko’alia mós nesesidade atu estabelese estratéjia nasionál ida ba seguransa sibernétika no mekanizmu resposta ida ne'ebé efetivu, no mós reforsa artikulasaun entre instituisoins nasionais ne'ebé responsavel ba jestaun ameasa sibernétika no esplora enkuadramentu legál no polítika hodi proteje infraestruturas importante ne’e. 

Hanesan pasu sira tuir mai, Governu Timor-Leste sei identifika nia nesesidades espesífikas ho objetivu atu diskute posivel akordu formál sira hodi reforsa kooperasaun bilaterál iha área ida-ne’e no hala’o avaliasaun ida hodi deteta lakunas no vulnerabilidades.  

Parte rua ne’e rekoñese importánsia atu hasoru dezafius siberseguransa nian no hatudu vontade atu hakle’an kolaborasaun téknika iha área ida-ne'e hodi salvaguarda infraestrutura dijitál no seguransa nasionál. Embaixadór Brendan Dowling subliña Governu Austrália nia disponibilidade atu apoia Timor-Leste hodi hatán ba ameasa hirak-ne’e, liuhusi subliña importánsia husi esforsu hamutuk ida atu garante protesaun ba espasu sibernétiku nasionál.