Governu Lansa Kampaña Nasionál kona-ba Prosesu Adezaun ba ASEAN
Iha loron 13 fulan-marsu 2025, Ministériu Negósius Estranjeirus no Kooperasaun sai uma-na’in kona-ba lansamentu ba Kampaña Nasionál Divulgasaun relasiona ho Prosesu Adezaun ba ASEAN, ho títulu “Dalan ba ASEAN”. 
Inisiativa ne’e hanesan rezultadu kolaborasaun entre Ministériu Negósius Estranjeirus no Kooperasaun, Ministériu Administrasaun Estatál no Uniaun Europeia, ho objetivu atu informa no envolve populasaun iha prosesu adezaun Timor-Leste ba ASEAN. Tuir Ministru Negósius Estranjeirus no Kooperasaun Bendito dos Santos Freitas, “tama ba ASEAN nu’udar objetivu nasionál estratéjiku ida” no “kompromisu ne’ebé metin ba integrasaun rejionál, kooperasaun no prosperidade koletiva”. "Maibé, atu adezaun ida-ne'e bele sai signifikativu duni, sidadaun hotu-hotu tenke komprende no simu adezaun ne’e." 
Kampaña adopta abordajen inkluzivu ida ne’ebé envolve parte interesada oioin, inklui setór emprezariál, grupu sosiál sira no komunidade lokál sira, ho objetivu atu hasa’e konxiénsia kona-ba ASEAN iha Timor-Leste laran tomak. “Sosiedade ida ne’ebé bein informadu sei la’ós de’it kontribui ba ami-nia nasaun nia progresu, maibé sei garante mós katak Timor-Leste sai membru ida ne’ebé ativu no orgullu ba família ASEAN”, Ministru reforsa tan. 
Hanesan parte ida hosi kampaña ida-ne’e, sei hala’o workshop no konsulta ho autoridade munisipál sira, universidades, setór privadu, sosiedade sivíl no reprezentante sira hosi governasaun sentrál no lokál. Planeia mós kolaborasaun besik ho Parlamentu Nasionál, ho promosaun diskusaun sira kona-ba dimensaun ekonómika, polítika, sósiu-kulturál no seguransa nian iha kontestu ASEAN. “Informasaun ne’ebé halibur liuhosi interasaun sira ne’e folin-boot tebes hodi forma ami-nia polítika no reforma institusionál sira, hodi garante katak ami kumpre kritériu adezaun nian ne’ebé estabelese ona,” governante ne’e destaka.
Eventu ne’e iha mós diskursu husi Embaixadór Uniaun Europeia iha Timor-Leste, Marc Fiedrich, ne’ebé destaka kompromisu Uniaun Europeia nian hodi apoia adezaun nasaun nian ba ASEAN. “Uniaun Europeia apoia maka’as Timor-Leste nia aspirasaun atu adere ba ASEAN. Parseria ida-ne’e reprezenta la’ós de’it integrasaun rejionál, maibé mós oportunidade ida ba dezenvolvimentu ekonómiku ne’ebé sustentável no aumentu ba prosperidade ba sidadaun timoroan tomak”, nia afirma. 
Embaixadór Malázia nian iha Timor-Leste, Amarjit Sarjit Singh, destaka importánsia husi abordajen inkluziva kampaña nian, hodi salienta katak prosesu adezaun ba ASEAN tenke to’o no informa ba populasaun iha nivel lokál, aliña ho tema atuál prezidénsia Malázia nian iha ASEAN, “Inkluzividade no Sustentabilidade”.
Vise-Primeiru-Ministru, Francisco Kalbuadi Lay, taka sesaun ne’e hodi reafirma kompromisu Timor-Leste nian ho ASEAN no ninia ambisaun atu sai membru organizasaun ba da-11. “Lansamentu ohin nian hatudu ami-nia dedikasaun metin atu sai membru plenu ASEAN nian”. Kampaña nasionál ida-ne’e sei garante katak sidadaun timoroan hotu-hotu bele kompriende signifikadu no benefísiu adezaun ba ASEAN ba futuru ami-nia nasaun nian”, nia deklara.
Serimónia lansamentu ne’e inklui momentu simbóliku inaugurasaun autokarru ida ne’ebé sei sai hanesan parte integrante husi kampaña ne’e, iha serimónia tesi fita ne’ebé lidera husi Vise-Primeiru-Ministru, Francisco Kalbuadi Lay, akompaña husi Ministru Bendito Freitas, Vise-Ministra ba Asuntus ASEAN Milena Rangel no Embaixadór Marc Fiedrich.
Eventu ne’e hetan partisipasaun husi membrus Governu Konstitusionál IX balun, reprezentantes Korpu Diplomátiku, setór privadu, sosiedade sivíl, grupus traballu timoroan sira kona-ba pilár tolu ASEAN nian, nune’e mós reprezentantes Sekretariadu ASEAN no instituisoins governamentais.
Kampaña ne’e sei divulga liuhosi meius komunikasaun oioin, inklui televizaun, rádiu, imprensa eskrita no redes sosiais. Ministériu Negósius Estranjeirus no Kooperasaun, iha koordenasaun ho Ministériu Administrasaun Estatál no Prezidente Autoridades Munisipais, sei hala’o mós vizitas ba munisípiu hotu-hotu durante tinan tomak, hodi garante katak populasaun iha asesu ba informasoins esensiais kona-ba prosesu adezaun ba ASEAN.
