Gravasaun ba programa datoluk "Página do Governo" ho Ministru Negósius Estranjeirus no Kooperasaun
Epizódiu datoluk hosi programa “Página do Governo” grava ona ohin, loron 14 fulan-marsu tinan 2025, inisiativa ida ne’ebé lidera hosi Ministru Prezidénsia Konsellu Ministrus no Portavós Governu nian, Agio Pereira, serbisu hamutuk ho Rádiu no Televizaun Timor-Leste (RTTL). Iha edisaun ida-ne’e, konvidadu maka Ministru Negósius Estranjeirus no Kooperasaun, Bendito dos Santos Freitas, ne’ebé ko’alia kona-ba tema sentrál relasiona ho polítika esterna país no jornada Timor-Leste nia adezaun plena ba ASEAN. 
Entrevista ne'e hala'o hosi aprezentadora Nélia Chaves no produsaun ezekutiva hosi Ika Moniz, hala'o iha Palásiu Governu no konta ho apoiu tékniku hosi ekipa mídia Gabinete Primeiru-Ministru no hosi Prezidénsia Konsellu Ministrus nian. Iha sesaun ne’e, Ministru Bendito dos Santos Freitas destaka konkista Ministériu nian hodi hametin relasaun diplomátika bilaterál no multilaterál, tuir prioridades estratéjika Governu Konstitusionál IX.
Entre tema sira ne'ebé diskute mak avansu iha prosesu adezaun ba ASEAN no dezafiu ne'ebé nasaun ne'e hasoru hodi kumpre rekizitu sira ne'ebé estabelese iha roteiru organizasaun nian. Ministru mós esplika kona-ba inisiativa Governu nian atu habelar prezensa diplomátika timoroan iha mundu no hametin parseria estratéjiku ho país sira hanesan Austrália, Indonézia no Portugál.
Pontu seluk ne’ebé destaka maka Timor-Leste nia knaar iha forum multilaterál no benefísiu sira ne’ebé rezulta hosi país ne’e nia partisipasaun iha organizasaun internasionál sira. Ministru mós mensiona esforsu Ezekutivu nian atu hadi’a servisu konsulár no garante atendimentu ida di’ak-liután ba sidadaun timoroan sira ne’ebé hela iha rai-li’ur. 
“Página do Governo” nu’udar espasu komunikasaun institusionál ida ne’ebé ho objetivu atu hakbesik Ezekutivu ba populasaun, liuhosi asegura transparénsia no prestasaun kontas kona-ba polítika públika no programa governu nian.
Hanoin hikas katak programa ne’e fó-sai ohin, loron 14 fulan-marsu tinan 2025, tuku 8 kalan, iha RTTL no iha mídia sosiál sira, ho konvidadu dahuluk programa ida-ne’e nian, Ministru Obras Públikas. Programa daruak, ho Ministru Administrasaun Estatál, sei fó sai iha loron 21 fulan-marsu.
Governu konvida sidadaun hotu-hotu atu akompaña transmisaun no partisipa ativu iha kanál komunikasaun institusionál foun ida-ne’e.
