Governu Timor-Leste

Sekretária Estadu Igualdade, Elvina Sousa Carvalho, partisipa iha komemorasaun Loron Internasionál Feto nian, ne’ebé organiza hosi Komisaun Ekonómika no Sosiál Nasoins Unidas ba Ázia no Pasífiku (UN-ESCAP, sigla iha lian inglés) no feto ONU, ne’ebé hala’o iha loron 6 fulan-marsu tinan 2025, iha Bankoke, Tailándia. Eventu ne’e halibur reprezentante governamentál sira ne’ebé responsavel ba asuntu igualdade jéneru no inkluzaun nian husi nasaun oioin iha rejiaun Ázia-Pasífiku, inklui Timor-Leste, hodi fó momentu ida ba reflesaun, avaliasaun no renovasaun kompromisu atu alkansa Objetivu Dezenvolvimentu Sustentável n. 5, kona-ba igualdade jéneru. 

Serimónia tinan ida-ne’e, ho tema “Ba feto no labarik-feto hotu-hotu: Direitus. Igualdade. Empoderamentu.”, destaka papél fundamentál hosi feto foin-sa'e sira iha lideransa inovasaun atu aselera igualdade jéneru, subliña oportunidade transformadora sira ne'ebé oferese hosi ekonomia verde no dijitál.

Iha kontestu komemorasaun rejionál Ázia-Pasífiku ne’e ba Loron Internasionál Feto tinan 2025, tema sira ne'ebé aborda ne’e asume relevánsia partikulár ba Konferénsia Ministeriál Ázia-Pasífiku kona-ba Revizaun Pekin+30. Eventu ne'e destaka potensiál feto foin-sa'e sira atu promove dezenvolvimentu ida ne’ebé sustentável no inkluzivu no diskute sira-nia kontribuisaun importante nu'udar ajentes ba mudansa hodi harii sosiedade ne'ebé ekuitativu no reziliente liu.

Tinan 2025 ne’e hatudu marka signifikativu ida ba movimentu globál igualdade jéneru, ne’ebé marka aniversáriu ba dala 30 Konferénsia Mundiál Dahaat kona-ba Feto no adosaun ba Deklarasaun no Plataforma Asaun Pekin nian. Data ne’e mós marka tinan lima ikus husi Ajenda Dezenvolvimentu Sustentável tinan 2030 no dalan ikus ba kumprimentu Objetivu Dezenvolvimentu Sustentável. 

Durante serimónia ne'e, promove mós inisiativa “Embaixadora ba Loron Ida”, ne'ebé lansa iha tinan 2021 hodi insentiva igualdade jéneru entre joven sira ho idade 16 to'o 25. Programa ne’e oferese oportunidade úniku ba foin-sa’e sira atu asume papél nu’udar Embaixadora ONU nian ka lider entidade ONU nian durante loron ida, hodi nune’e bele promove dezenvolvimentu kompeténsia lideransa no hasa’e konxiénsia kona-ba importánsia igualdade jéneru nian. Inisiativa ne’e ho objetivu atu hametin partisipasaun ativa husi jerasaun foun sira hodi defende direitu feto no labarik-feto sira nian. 

Diretór-Jerál Sekretaria Estadu Igualdade nian, Armando da Costa, halo parte mós iha delegasaun ne’ebé lidera hosi Sekretária Estadu iha eventu ne’e.