Epizódiu dahuluk hosi programa “Página do Governo” estreia aban iha RTTL no iha media sosiál
IX Governu Konstitusionál anunsia katak aban, loron 14 fulan-marsu tinan 2025 sei hahú transmisaun epizódiu dahuluk hosi programa talkshow “Página do Governo”, ne’ebé sei transmite, iha Rádiu no Televizaun Timor-Leste (RTTL) no media ofisiál sira Governu nian. 
Inisiativa ne’e, promove hosi Ministru Prezidénsia Konsellu Ministru no Portavós Governu nian, Agio Pereira, iha parseria ho RTTL, ho objetivu atu kria plataforma ida ba komunikasaun direta entre Governu no sidadaun sira, hodi promove transparénsia no diálogu kona-ba inisiativa no prioridades prinsipais Governu nian.
Iha epizódiu dahuluk, ho Nélia Chaves hanesan apresentadora no Ika Moniz hanesan produtora ezekutiva, Ministru Obras Públikas, Samuel Marçal, aprezenta planu sira hosi Governu ba setór infraestrutura, área ida-ne’ebé estratéjiku ba dezenvolvimentu nasaun nian. Debate sei foka liu ba projetu prioritáriu sira, hanesan reabilitasaun ba estrada no ponte sira, hadi'a fornesimentu bee no eletrisidade no mitigasaun ba risku sira inundasaun nian, hodi reforsa kompromisu Ezekutivu nian ba kreximentu sustentável Timor-Leste nian.
Ministru Agio Pereira destaka katak programa ida-ne’e reprezenta “espasu ida ba diálogu no transparénsia, hodi permite populasaun akompaña, ho forma klaru no objetivu, Governu nia asaun sira”.
Governu konvida sidadaun hotu-hotu atu akompaña transmisaun no partisipa ativamente iha kanál komunikasaun institusionál foun ne’e.
