RTTL, EP Inisia Siklu Foun ho Simu Pose Elizeu Isaac Fernandes nian
Ministru Prezidénsia Konsellu Ministrus, Agio Pereira, akompaña husi Sekretáriu Estadu Komunikasaun Sosiál, Expedito Loro Dias Ximenes, fó pose ba Elizeu Isaac Fernandes iha loron 13 fulan-marsu tinan 2025, iha Palásiu Governu, nu’udar Prezidente Konsellu Administrasaun Rádiu no Televizaun Timor-Leste, EP (RTTL, EP), ba mandatu tinan haat. 
Iha nia diskursu, Ministru Prezidénsia Konsellu Ministrus destaka knaar fundamentál RTTL nu’udar konsesionáriu ba servisu públiku radiodifuzaun nian, no reafirma kompromisu Governu hodi moderniza empreza ne’e no reforsa komunikasaun sosiál iha rai-laran. “RTTL nia misaun define ho klaru no inklui garante servisu rádiu no televizaun ne’ebé imparsiál, plurál no asesivel ba sidadaun hotu-hotu. Governu sei kontinua fó apoiu ba modernizasaun infraestruturas, atualizasaun teknolójika no kapasitasaun ba profisionais empreza nian hodi hasa’e kualidade informasaun no habelar ninia kobertura iha nivel nasionál”, nia afirma. 
Subliña importánsia hosi komunikasaun sosiál ida ne’ebé independente no kredivel, Ministru reforsa katak RTTL tenke kontinua hala’o nia knaar ho responsabilidade no kompromisu públiku. “Ita hakarak RTTL ida ne’ebé forte, inovativu no asesivel ba beibeik, ne’ebé promove ita-nia lian, ita-nia kultura no valores sidadania nian. Informasaun ho kualidade hanesan pilár ida ba demokrasia no ita-nia rádiu no televizaun públika iha papél sentrál hodi habelar koñesimentu no promove debate públiku kona-ba ideia sira.”
Agio Pereira mós subliña nesesidade ba jestaun ida ne’ebé efisiente ba empreza no kompromisu hosi ninia profisionál sira hodi promove servisu públiku. “Modernizasaun RTTL tenke akompaña ho kompromisu ne’ebé metin ba étika jornalístika, rigór informativu no imparsialidade. Komunikasaun sosiál tenke sai espasu ida ne’ebé lian hotu-hotu iha oportunidade atu espresa sira-nia an no iha ne’ebé sidadaun sira bele hetan informasaun kredivel no ekilibradu”, nia deklara. 
Sekretáriu Estadu Komunikasaun Sosiál, Expedito Dias Ximenes foka liu importánsia jestaun di’ak ba rekursus públikus no nesesidade atu garante funsionamentu efisiente RTTL, EP nian. “Empreza tenke respeita nafatin prinsípius funsaun públika nian, hodi asegura jornalizmu ida ne’ebé independente, kredivel no asesivel ba timoroan sira hotu. Governu reafirma ninia kompromisu hodi garante katak RTTL kumpre nia misaun atu informa, eduka no promove identidade nasionál”, nia subliña.
Prezidente Konsellu Administrasaun foun, Elizeu Isaac Fernandes, espresa ninia kompromisu atu hametin RTTL, hodi destaka importánsia atu adapta empreza ba dinámika foun setór nian. “RTTL la’ós de’it meius komunikasaun ida, maibé pilár ida ba demokrasia timoroan nian. Ha’u sei serbisu besik ho ekipa sira RTTL nian atu reforsa kredibilidade no inovasaun iha setór komunikasaun sosiál, hodi garante katak empreza ne’e kontinua serbí interese públiku ho profisionalizmu no rigor informativu”, nia afirma. 
Nomeasaun ba Elizeu Isaac Fernandes formaliza hosi Konsellu Ministrus liuhosi Rezolusaun Governu n. 15/2025, loron 17 fulan-marsu, hodi troka José António Belo ‘Taraleu’, ne’ebé Ministru no Sekretáriu Estadu hato’o rekoñesimentu ba ninia serbisu no dedikasaun durante ninia mandatu tomak.
Serimónia ne’e partisipa mós hosi Ministru Planeamentu no Investimentu Estratéjiku, Gastão Francisco de Sousa, Vise-Ministru Asuntus Parlamentares, Adérito Hugo da Costa, Prezidente Konsellu Diretivu Ajénsia Tatoli nian, Noémio Mateus Soares Falcão, nune’e mós lideres no reprezentantes hosi meius komunikasaun nasionál oioin. 
