Governu Timor-Leste

Iha loron dahuluk, Sesaun Komisaun da-69 kona-ba Estatutu Feto (CSW, sigla iha lian inglés), ne’ebé hala’o iha loron 10 fulan-marsu tinan 2025, Sekretária Estadu Igualdade, Elvina Sousa Carvalho, partisipa iha Diálogu Interativu Altu Nivel nian kona-ba rezultadu revizaun rejionál sira iha Prosesu Pekin+30. Durante ninia intervensaun, Sekretária Estadu destaka dezafiu no progresu sira ne’ebé Timor-Leste alkansa ona iha promosaun igualdade jéneru no empoderamentu feto, iha kontestu aniversáriu Plataforma Asaun Pekin nian ba da-30. Eventu ne’e hala’o iha sede Nasoins Unidas, Novaiorke, no halibur reprezentante governamentál, organizmu internasionál sira no sosiedade sivíl. 

Debate ne’e prezide hosi Ministra Asuntus Feto hosi Kamboja, Ing Kantha Phavi, no konta ho partisipasaun hosi Sekretária Ezekutiva Komisaun Ekonómika no Sosiál nian ba Ázia no Pasífiku (ESCAP), Armida Salsiah Alisjahbana, Vise-Ministra no Vise-Xefe Komisaun Nasionál Traballu ba Labarik no Feto sira Konsellu Estadu Xina nian, Lin Yi, nune’e mós reprezentante sira hosi sosiedade sivíl no juventude.

Durante ninia diskursu, Sekretária Estadu Igualdade kongratula ESCAP no Feto ONU sira ba serbisu hamutuk hodi lidera prosesu avaliasaun ba implementasaun Pekin+30 no susesu Konferénsia Ministeriál Ázia-Pasífiku nian, ne'ebé hala'o iha Bangkok, iha fulan-novembru tinan 2024. Nia mós destaka katak Pekin+30 fornese ona dadus relevante sira kona-ba progresu sira ne’ebé alkansa ona no dezafiu sira ne’ebé eziste iha promosaun igualdade jéneru. “Nasaun barak iha rejiaun ne’e subliña katak igualdade jéneru nu’udar pilár fundamentál ida ba dezenvolvimentu no integra iha sira-nia polítika nasionál, lejizlasaun no programa sira”, nia afirma.

Entre dezafiu prinsipál sira ne’ebé presiza atensaun prioridade, Sekretária Estadu destaka área esensiál lima: empoderamentu ekonómiku feto nian, prevensaun no resposta ba violénsia bazeia ba jéneru, feto nia partisipasaun iha pozisaun lideransa nian, envolvimentu juventude iha promosaun igualdade, no implementasaun orsamentu sira ne’ebé responde ba jéneru.  “Ita aselera empoderamentu ekonómiku feto nian presiza halakon barreira sira atu hetan asesu ba merkadu traballu, kréditu no protesaun sosiál. Nune’e mós esensiál atu enkoraja partisipasaun feto iha setór siénsia, teknolojia, enjeñaria no matemátika”, nia reforsa. 

Sekretária Estadu destaka mós nesesidade atu hadi’a prevensaun no resposta ba violénsia bazeia ba jéneru liuhosi mekanizmus institusionais ne’ebé efetivu no finansiamentu ida ne’ebé adekuadu ba servisus apoiu ba vítima sira. Relasiona ho partisipasaun feto iha polítika, nia dehan katak Timor-Leste adota ona medidas afirmativas, hanesan kuotas eleitorais, ne’ebé hasa’e ona reprezentasaun feto iha Parlamentu Nasionál. “Maibé, presiza kontinua investe iha kapasitasaun polítika feto no edukasaun sívika populasaun nian hodi garante reprezentasaun ida ne’ebé ekuitativa”, nia akresenta.

Sekretária Estadu defende mós importánsia atu envolve joven sira iha promosaun igualdade jéneru no protesaun direitu labarik sira nian, no destaka nesesidade atu implementa abordajen integradu ida kona-bá jéneru iha orsamentu Estadu nian.

 “Institusionalizasaun orsamentu sira ne’ebé responde ba jéneru ne’e importante tebetebes hodi garante inkluzaun feto sira iha polítika dezenvolvimentu no responsabilizasaun efetiva Governu nian iha implementasaun ba kompromisu nasionál no internasionál iha matéria igualdade jéneru”, nia subliña.

Iha eventu hanesan, Diretora Ezekutiva Feto ONU, Sima Bahous, rekoñese progresu ne'ebé halo ona iha tinan 30 ikus ne'e dezde Konferénsia Pekin nian, maibé alerta kona-ba dezafiu sira ne'ebé nafatin iha. “Maske iha progresu, feto sira kontinua hasoru obstákulus estruturais ne'ebé difikulta sira-nia partisipasaun tomak iha sosiedade. Deklarasaun Pekin no Plataforma Asaun nian sai nafatin dokumentus fundamentais hodi orienta ita-nia esforsu sira”, nia afirma.

Komisaun kona-ba Estatutu Feto (CSW) maka órgaun intergovernamentál globál prinsipál ne'ebé dedika de’it ba promosaun igualdade jéneru no empoderamentu feto. Sesaun ba da-69 hala’o iha ámbitu selebrasaun tinan 30 hosi adosaun Deklarasaun no Plataforma Asaun Pekin nian, nu’udar marku istóriku ida ba defeza direitus feto iha mundu tomak.  Eventu ne’e partisipa hosi reprezentantes Estadus-Membrus, entidades Nasoins Unidas no organizasoins sosiedade sivíl ne’ebé akreditada hosi Konsellu Ekonómiku no Sosiál Nasoins Unidas nian (ECOSOC). 

Delegasaun nasionál iha sesaun CSW ba da-69 inklui mós Vise-Ministra Solidariedade Sosiál no Inkluzaun, Céu Brites, Prezidente Komisaun F Parlamentu Nasionál, Maria Goru-Mali Barreto, Embaixadór Permanente Timor-Leste ba ONU, Dionísio Babo Soares, no téknikus husi Gabinete Sekretária Estadu Igualdade nian.