Governu Timor-Leste

Semináriu Nasionál ne’e hala’o ohin, loron 11 fulan-marsu tinan 2025, iha Auditóriu Sentru Formasaun Polísia nian, hodi selebra aniversáriu Polísia Nasionál Timor-Leste (PNTL) ba da-25, ne’ebé sei selebra iha loron 27 fulan-marsu, ho tema “Hamutuk Ita Hametin Konfiansa”. Reprezenta Primeiru-Ministru, Kay Rala Xanana Gusmão, Ministru Prezidénsia Konsellu Ministrus, Agio Pereira, sai hanesan oradór ida iha eventu refere, hodi aprezenta vizaun Governu nian kona-ba evolusaun PNTL durante ninia ezisténsia tinan 25. 

Iha niniaintervensaun, Ministru Agio Pereira destaka importánsia hosi konfiansa populasaun nian ba PNTL, hodi subliña katak fatór ida-ne’e “importante tebetebes” atu nune’e Polísia Nasionál Timor-Leste “bele serbí nasaun no bein-komún” no katak “lahó konfiansa ne’e, PNTL bele lakon ninia lejitimidade iha uzu forsa nian”.

Hanoin hikas kona-ba trajetória instituisaun nian, nia hatete katak “tinan 25 liubá, PNTL harii iha períodu tranzisaun ida ne’ebé kompleksu tebes, presiza tempu hodi hetan konfiansa hosi populasaun”. Maske iha dezafiu sira, nia afirma katak instituisaun ne’e, ho nia lideransa, konsege reziste iha momentu sira ne'ebé difisil tebes. “Ierarkia  PNTL, ho apoiu polítiku, determinadu nafatin, la rende, hodi kontinua hametin instituisaun ida-ne’e,” nia akresenta. Nia destaka mós katak “ohin loron, PNTL hetan respeitu hosi ema hotu-hotu no rekoñesida nu’udar forsa ne’ebé asegura lei no orden, nune’e halo povu bele toba ho hakmatek”. 

Ministru mós reforsa katak “Governu konsidera katak rekursu ida ne’ebé folin liu hosi kualkér instituisaun, liuliu PNTL, maka ninia rekursu umanu sira”, hodi subliña nesesidade ba investimentu ida kontínuu ihaformasaun ba ajentes. “Governu konsentra esforsu tomak atu garante katak PNTL iha profisionál sira ne’ebé kualifikadu tebes, ho kapasidade atu halo intervensaun iha komunidade, ho kompeténsias kona-ba jestaun no entendimentu polítiku. PNTL tenke kompriende polítika, maibé la bele hala’o polítika– ne’e maka prinsípiu fundamentál ida”, nia afirma.

Semináriu Nasionál ne’e konta ho diskursu benvindu husi Komandante Jerál, Komisáriu Jerál Henrique da Costa, no intervensoins ba abertura no enserramentu hosi Ministru Interiór, Francisco da Costa Guterres. 

Xefe Estadu, José Ramos-Horta, aprezenta Prezidénsia Repúblika nia perspetiva kona-ba perkursu PNTL nian durante tinan 25, enkuantu Vise-Ministra ba Asuntus ASEAN, Milena Maria da Costa Rangel, ko’alia kona-ba adezaun Timor-Leste ba ASEAN hosi perspetiva seguransa nian. Koordenadora Rezidente Nasoins Unidas nian iha Timor-Leste, Funmi Balogun, fahe vizaun organizasaun nian kona-ba evolusaun PNTL iha dékada rua ho balun ikus ne’e. 

Sesaun enserramentu ne’e dirije husi Ministru Interiór, Francisco da Costa Guterres, ne’ebé reafirma kompromisu Governu nian hodi hametin kapasidade PNTL no hametin seguransa públika iha país ne’e.