Governu Timor-Leste

Ministériu Planeamentu no Investimentu Estratéjiku no Banku Sentrál Timor-Leste, serbisu hamutuk ho Korporasaun Finanseira Internasionál (IFC, sigla iha lian inglés), organiza Forum ba Dezenvolvimentu Merkadu Abitasaun Timor-Leste, iha loron 6 fulan-marsu tinan 2025, iha Auditóriu Kay Rala Xanana Gusmão, Ministériu Finansas.

Objetivu hosi eventu ida-ne’e mak atu promove reflesaun ida kona-ba dezenvolvimentu setór abitasaun no identifika solusaun ba dezafiu sira ne’ebé eziste, atu nune’e bele garante asesibilidade ba abitasaun ne’ebé dignu ba sidadaun timoroan hotu. 

Forum ne’e konta ho partisipasaun hosi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, ne’ebé reprezenta Primeiru-Ministru Kay Rala Xanana Gusmão, destaka kompromisu Governu Konstitusionál da-9 nian ho dezenvolvimentu ekonómiku no hadi’a populasaun sira-nia kondisaun moris. “Abitasaun ne’ebé dignu nu’udar direitu fundamentál no pilár ida ba dezenvolvimentu sustentavel iha país. Governu iha kompromisu hodi kria kondisaun sira atu sidadaun sira bele hetan asesu ba hela-fatin ida ne’ebé adekuadu, seguru no konfortavel, atu nune’e hodi garante dignidade família nian”, afirma Vise-Primeiru-Ministru. 

Ministru Planeamentu no Investimentu Estratéjiku, Gastão de Sousa, afirma katak, forum ida-ne’e nia objetivu prinsipál mak atu halibur reprezentante sira husi setór públiku no privadu hodi debate kona-ba dezafiu sira dezenvolvimentu abitasionál nian, no mós define prioridade sira hodi apoia kriasaun ba kondisaun sira ne’ebé permite sidadaun sira moris iha fatin seguru no dignu. “Ida-ne’e mak objetivu loloos sidadaun sira hotu nian”, destaka Ministru. 

Governadór Banku Sentrál nian, Hélder Lopes, iha ninia intervensaun subliña importánsia fundamentál merkadu ipotekáriu nian ba dezenvolvimentu iha setór abitasionál. “Abitasaun maka nesesidade esensiál ida ba família ida-idak. Fó seguransa, estabilidade no dignidade ba ita-nia povu. Iha tempu hanesan, setór abitasionál forte maka hasa’e kreximentu ekonómiku, permite kria empregu, estimula indústria konstrusaun no habelar servisu finanseiru. Merkadu ipoteka nian iha papél importante ida hodi halo propriedade uma nian sai asesivel, hodi permite família sira atu investe iha sira nia futuru nomos kontribui ba dezenvolvimentu nasionál”, Governadór ne'e hateten. 

David Freedman, reprezenta IFC iha Timor-Leste, destaka abitasaun nu’udar direitu umanu ida ne’ebé fundamentál, ne’ebé rekoñese husi Deklarasaun Universál ba Direitus Umanus nune’e mós husi Konstituisaun Timor-Leste. Nia hatutan tan importánsia ba dezenvolvimentu merkadu abitasionál ida ne’ebé sustentavel no inkluzivu, hodi defende katak, abitasaun ne’ebé adekuadu la’ós de’it hadi’a ema nia kondisaun moris, maibé mós kontribui ba estabilidade ekonómika no sosiál iha país.

Durante Forum ne’e, diskute kona-ba difikuldade sira ne’ebé eziste nafatin iha merkadu imobiliáriu Timor-Leste nian, inklui asesu limitadu ba finansiamentu asesivel, barreira regulatóriu no legál sira, subdezenvolvimentu setór finanseiru no nesesidade ba estabilidade makroekonómika ida ne’ebé boot liu.