Governu Timor-Leste

Iha loron 7 fulan-marsu tinan 2025, Sekretaria Estadu Igualdade, Ministériu Negósius Estranjeirus no Kooperasaun no Feto ONU iha Timor-Leste organiza, Forum kona-ba Lideransa Feto nian, ne’ebé marka inísiu selebrasaun Loron Internasionál Feto iha país ne’e, iha Salaun Nobre Ministériu Negósius Estranjeirus no Kooperasaun. Ho tema “Feto bele lidera iha área hotu-hotu”, eventu ne’e subliña importánsia husi empoderamentu feto no rekoñese feto sira-nia kapasidade atu asume papél lideransa nian iha setór oioin. 

Eventu ne’e fó espasu ida ba debate kona-ba dezafius persistentes no progresus ne’ebé alkansa ona iha promosaun igualdade jéneru, ho énfaze ba nesesidade atu halakon barreiras estruturais no sosiais ne’ebé limita feto sira-nia partisipasaun tomak iha vida polítika, ekonómika no sosiál país nian. Forum ne’e hetan partisipasaun hosi reprezentantes Prezidénsia Repúblika, Parlamentu Nasionál, Governu, Prokuradoria-Jerál Repúblika, korpu diplomátiku, parseirus dezenvolvimentu no organizasoins sosiedade sivíl nasionál no internasionál, hodi reforsa kompromisu hamutuk atu defende direitu feto sira nian no kria oportunidade ekuitativa. 

Tinan ida ne’e, Loron Internasionál Feto hala’o ho tema globál “Ba feto no labarik-feto hotu-hotu: Direitus. Igualdade. Empoderamentu.”, ne’ebé subliña importánsia husi kompromisu koletivu ida atu harii mundu ida ne’ebé justu liu, iha ne’ebé feto no labarik-feto hotu-hotu iha asesu ba direitu no oportunidade ne’ebé hanesan.  Eventu ne’e koinside mós ho aniversáriu Deklarasaun no Plataforma Asaun Pekin nian ba dala 30, dokumentu fundamentál ida iha promosaun igualdade jéneru iha nivel globál, ne’ebé sei sai hanesan tema sentrál hosi reuniaun altu nivel iha Komisaun kona-ba Estatutu Feto (CSW) ba dala 69, ne’ebé sei hala’o iha loron 10 to’o 21 fulan-marsu tinan 2025, iha Novaiorke. 

Vise- Ministra ba Asuntus ASEAN, Milena Maria da Costa Rangel, iha ninia intervensaun, destaka importánsia husi selebrasaun ida-ne’e nu’udar momentu ida atu rekoñese feto sira-nia kontribuisaun ba dezenvolvimentu nasaun nian. “Feto sira la’ós de’it partisipante, sira hanesan lider, inovadora no ajente ba mudansa iha setór oioin. La haree ba sira-nia orijen, etnia ka klase sosiál, tenke rona sira-nia lian, no importante tebetebes atu kontinua serbisu hodi hasai barreiras ne’ebé limita sira-nia partisipasaun tomak iha sosiedade”, nia hateten. 

Iha nia diskursu, Sekretáriu Estadu Komunikasaun Sosiál no Sekretáriu Estadu Igualdade ein-ezersísiu, Expedito Dias Ximenes, destaka progresu sira ne’ebé alkansa ona liuhosi kolaborasaun entre Governu ho ninia parseiru sira, liuliu iha reforsu ba protesaun legál ba feto no labarik-feto sira, asesu ba servisu esensiál, mobilizasaun joven ba igualdade jéneru, transformasaun normas sosiál no iha aumentu partisipasaun feto iha área oioin. “Governu kompromete ona atu kontinua promove igualdade jéneru no defeza direitus feto no labarik sira nian, hodi kombate forma violénsia, diskriminasaun no esplorasaun hotu-hotu”, dehan Expedito Dias Ximenes.

Eventu ne’e inklui mós leitura mensajen husi Prezidente Repúblika kona-ba Loron Internasionál Feto no aprezentasaun gastronómika kulturál husi Timor-Leste no embaixada oioin ne’ebé iha Timor-Leste.