Primeiru-Ministru Simu Aprezentasaun Programa “Pagina Do Governo”
Dili, 4 Marsu 2025: Ekipa Portavós Governu nian, hamutuk ho ekipa media Gabinete Primeiru-Ministru no Ministériu Obras Públikas, aprezenta ba Primeiru-Ministru, Kay Rala Xanana Gusmão, epizódiu dahuluk programa “Página do IX Governo Constitucional”. Sesaun ne’e hetan partisipasaun husi Ministru Prezidénsia Konsellu Ministru, Agio Pereira, no Ministru Obras Públikas, Samuel Marçal. 
“Página do IX Governo Constitucional”, inisiativa ida ne’ebé promove hosi Ministru Prezidénsia Konsellu Ministrus, Agio Pereira, iha nia knaar nu’udar Portavós Governu nian no iha parseria ho Rádiu-Televizaun Timor-Leste (RTTL). Konta mós ho apoiu tékniku hosi ekipa mídia sira hosi Gabinete Primeiru-Ministru, Prezidénsia Konsellu Ministrus no Ministériu Obras Públikas. Programa ida-ne’e ho objetivu atu kria plataforma ida ba komunikasaun direta entre Governu no sidadaun sira, hodi promove transparénsia no diálogu kona-ba inisiativa no prioridade prinsipál sira Governu nian. 
Epizódiu dahuluk sei fó-sai iha tempu badak iha RTTL no iha rede sosiál ofisiál sira Governu nian.
