Governu Timor-Leste

Komisaun Téknika Akompañamentu (CTA, sigla iha lian portugés) hosi Organizasaun Jogus Komunidade País Lian Portugés (CPLP, sigla iha lian portugés) iha Timor-Leste, husi loron 22 fulan-fevereiru to’o loron 01 fulan-marsu hodi avalia kondisaun lojístika no infraestrutura ba edisaun da-12 Jogu Desportivu CPLP nian, ne'ebé sei hala'o hosi loron 17 to'o loron 25 fulan-jullu 2025. Durante estadia iha Timor-Leste, ekipa hasoru malu ho autoridades governamentál, vizita fatin kompetisaun sira no aprezenta rekomendasaun téknika sira hodi otimiza organizasaun eventu nian. 

Koordenadór Desportu Konferénsia Ministrus Juventude no Desportu CPLP, Jorge Carvalho, ne’ebé lidera hela ekipa ida-ne’e, destaka avansu sira iha preparativus dezde vizita ikus no subliña importánsia hosi inisiativa ba hametin desportu iha Timor-Leste. “Dezde ami-nia vizita ikus, ami haree ona progresu signifikativu iha obra renovasaun ba infraestrutura desportu nian. Ida ne’e esensiál atu garante katak kumpre kondisaun hotu-hotu hodi simu atleta sira ne’ebé maizumenus na’in-800 ne’ebé sei partisipa iha Jogu sira iha edisaun ida-ne’e”, nia hateten. 

CTA hala’o inspesaun iha Estádiu Munisipál Dili, Kampu Voleiból Praia iha Lecidere, Jináziu Dili no Centro de Convenções de Díli, ne’ebé sei sai fatin ba kompetisaun sira iha modalidade oioin ne’ebé programa ona, inklui futeból, voleiból, basketeból, taekwondo, karate no xadrés. Vizita ne’e inklui mós enkontru ho Ministériu Juventude, Desportu, Arte no Kultura, Saúde, Interiór no Transportes no Komunikasoins, no mós enkontru ho Komisaun Organizadora Lokál ba Jogus Desportivu CPLP nian. 

Sekretáriu Estadu Arte no Kultura, Jorge Cristóvão, reafirma kompromisu Governu nian hodi organiza Jogu sira no adota rekomendasaun sira ne’ebé fó-sai hosi CTA. “Ekipa téknika apresia ho preparasaun no rekoñese serbisu ne’ebé halo ona to’o agora. Ami sei kontinua halo koordenasaun ho nasaun partisipante sira no garante katak kondisaun nesesáriu hotu-hotu iha ona hodi realiza eventu ne’e”, nia hateten.

Vizita CTA ne’e sai mós hanesan oportunidade ida atu ko’alia kona-ba envolvimentu hosi komunidade lokál hodi hala’o Jogu sira ne’e. Governu organiza hela grupu voluntáriu ida ne'ebé kompostu hosi estudante universitáriu maizumenus na'in-200, ne'ebé sei akompaña delegasaun sira no kontribui ba dinamizmu eventu nian. 

Jogu Desportivu CPLP ne’e hanesan kompetisaun multi-desportu ida ne’ebé dirije ba atleta ho tinan 16 mai kraik, ne’ebé ho objetivu atu promove kooperasaun no solidariedade entre nasaun luzófonu sira. Dezde nia kriasaun iha tinan 1992, hala’o ona edisaun sanulu-resin-ida, ida-ne’e hanesan ba dala uluk maka Timor-Leste sai uma-na’in ba eventu ne’e. Ezekutivu timorense aprova ona orsamentu ida ho dolar amerikanu millaun 3,73 hodi organiza Jogu sira ne’e, ho objetivu atu halo susesu kompetisaun no projesaun nasaun nian iha kontestu desportivu internasionál. 

Iha loron 27 fulan-fevereiru, Komisaun Téknika Akompañamentu hasoru malu ho Primeiru-Ministru, Xanana Gusmão, no reforsa kompromisu CPLP nian atu kolabora ho Timor-Leste hodi garante susesu hosi kompetisaun ne’e. Husu mós mobilizasaun hosi setór hotu-hotu iha sosiedade hodi garante katak Jogus Desportivu CPLP hanesan selebrasaun desportu no amizade entre povu sira ne'ebé ko'alia lian portugés.