Governu Timor-Leste

Primeiru-Ministru, Kay Rala Xanana Gusmão, hala’o sorumutu iha Dili, iha loron 27 fulan-fevereiru tinan 2025, ho emprezáriu nasionál sira iha Salão Delta Nova, iha enkontru ida ne’ebé realiza hosi Ministériu Obras Públikas, hodi ko’alia kona-ba knaar setór privadu iha dezenvolvimentu nasionál no maneira atu hametin kooperasaun entre Governu ho emprezáriu sira. 

Iha sorumutu ne’e, Xefe Governu subliña importánsia setór privadu nian iha kriasaun empregu no kreximentu ekonómiku, husu ba emprezáriu sira atu kontribui ho seriedade no responsabilidade ba konstrusaun Estadu. “Ha’u husu atu ita-boot sira halo serbisu ho kualidade. Karik ita-boot sira hakarak kontribui, tenke garante katak ita-boot sira halo ida-ne’e ho forma ida ne’ebé responsavel no ho kualidade”, tenik Primeiru-Ministru, hodi reforsa nesesidade ba kompromisu ida ne’ebé efetivu ba kualidade no sustentabilidade projetus nian. Nia hatutan tan katak “setór privadu iha papél fundamentál ida atu harii Estadu no hametin Nasaun”. 

Primeiru-Ministru hato’o preokupasaun kona-ba atitude emprezáriu balun ne’ebé hetan kontratu governu nian sein garantia kualidade servisu ne’ebé presta, to’o abandona projetu sira. Nia destaka katak situasaun ida-ne'e fó impaktu ba progresu nasaun nian no husu responsabilidade no kompromisu boot-liu hosi setór privadu. “Setór privadu importante tebes hodi kria empregu no apoia Estadu”, nia hatutan.

Ministru Obras Públikas, Samuel Marçal, reforsa apelu ne’e atu iha seriedade no kompromisu ba projetu nasionál sira, hodi hatudu katak governu estrutura ona planu estratéjiku oioin, maibé depende ba setór privadu atu impulsiona nia implementasaun no kria tan oportunidade empregu ba joven sira. “Ohin, iha Primeiru-Ministru nia oin, ha’u apela ho sériu ba ita-boot sira atu nune’e, bainhira Governu fó fiar ba ita-boot sira projetu ruma ba nasaun, ita-boot sira serbisu ho dedikasaun no responsabilidade. Estadu presiza tebes imi-nia apoiu. Mai ita hamutuk hodi dezenvolve Timor-Leste”, deklara Ministru. 

Enkontru ne’e hetan partisipasaun husi Prezidente Kámara Komérsiu no Indústria Timor-Leste (CCI-TL, sigla iha lian portugés), Jorge Serrano, nune’e mós emprezáriu nasionál no reprezentantes hosi estrutura munisípiu sira. Emprezáriu sira hetan oportunidade hodi esplika difikuldade ne’ebé sira hasoru no husu Governu nia apoiu atu ultrapasa dezafiu sira no hametin setór privadu timoroan. 

Governu reafirma ninia kompromisu atu kolabora ho setór privadu hodi garante ambiente emprezariál ne’ebé forte no sustentável liu, hodi nune’e bele promove kreximentu ekonómiku no dezenvolvimentu nasaun nian.