TIMOR GAP ho Eni Asina Akordu hodi Esplora Rekursus Petrolíferus
Iha loron 24 fulan-fevereiru tinan 2025, Ministru Petróleu no Rekursus Minerais, Francisco da Costa Monteiro, sai sasin ba asinatura Akordu Sessaun no Aseitasaun ba Partisipasaun Estadu nian iha Operasoins Petrolíferas iha ámbitu Kontratu Fahe Produsaun ba Área Kontratu PSC-TL-SO-22-23.
Reprezenta Ministériu Petróleu no Rekursus Minerais, Autoridade Nasionál Petróleu (ANP) asina Akordu ne’ebé temi ona ho Eni Timor 22-23 B.V. (Eni) no TIMOR GAP PSC TL-SO-22-23 Unipessoal, Limitada (TIMOR GAP), subsidiária ida hosi TIMOR GAP, EP. 
Bazeia ba Akordu ida-ne’e, no relasiona ho direitu partisipasaun Estadu nian tuir Lei Timor-Leste nian, atribui ba TIMOR GAP interese partisipasaun ho 12.5% iha CPP TL-SO-22-23.
Ministru Francisco Monteiro afirma katak “governu iha polítika ida ne’ebé klaru hodi garante partisipasaun másima husi empreza estatál iha dezenvolvimentu rekursus naturais”. Ba governante ne’e, asina akordu entre TIMOR GAP, E.P no ENI nu’udar “pasu konkretu ida iha ezekusaun polítika ida-ne’e no ita hein katak entidade rua ne’e implementa kompromisu ne’e ho efetivu”. Nia hatutan tan katak “ENI nia investimentu no desizaun atu aloka orsamentu ba peskiza no esplorasaun sízmika sai nu’udar sinál klaru hosi konfiansa iha kapasidade Timor-Leste nian atu dezenvolve ninia setór enerjétiku no hasa’e ekonomia nasionál”. 
Kontratu Fahe Produsaun TL-SO-22-23, ne’ebé asina entre ANP no Eni iha loron 14 fulan-dezembru tinan 2023. Área kontratu, ne'ebé uluk koñesidu ho naran Bloku P, lokaliza iha kosta súl Tasi Timor-Leste nian, entre kampus gás Greater Sunrise iha parte norte no kampu gás Chuditch nian iha parte súl. Bloku ida-ne'e entre Bloku 18 ne'ebé maka Governu Timor-Leste loke liuhosi Ronda Daruak Lisensiamentu Timor-Leste nian 2019/2022.
Tuir Kontratu Fahe Produsaun ida-ne’e, Eni ho nia parseiru Joint Venture ne’ebé foin harii, TIMOR GAP, iha kompromisu ba programa serbisu ativu ida ne’ebé inklui atividade sízmika no perfurasaun.
Serimónia asinatura ida-ne’e loke dalan ba kolaborasaun ne’ebé metin entre Timor-Leste no Eni hodi esplora petróleu no gás ne’ebé boot liután iha ámbitu jurisdisoins nasionais no atu promove dezenvolvimentu indústria iha país ne’e. 
