Governu Timor-Leste

Hafoin liu tiha fulan neen, vizitante liu rihun hitunulu, Espo 2010 Xangai Xina, taka odamatan sira iha loron 31 fulan Outubru. Espozisaun Universál-World Expo 2010 Shangai-hatudu kultura  barak-barak, ideia no teknolojia, mai husi nasaun atus ida ualunulu resin sia no empreza sira sanulu resin. Ida ne’e, nu’udár espozisaun ne’ebé mak boot liu iha istória, no ba dahuluk ne’ebé mak Timor-Leste partisipa, hanesan País soberanu no independente ida. Durante fulan neen (hosi fulan Maiu to’o Outubru) Pavillaun Timor-Leste nian hetan vizita hosi ema rihun ba rihun ne’ebé mak iha biban atu, maski husi dook, bele hatene aspetu balu ne’ebé mak karateriza Nasaun foun ne’e, tuir Sekretáriu Estadu Kultura nu’udár komisáriu ida hosi komisáriu hirak seluk Timor-Leste nian ba espozisaun ne’e, esplika:”Ema hirak mai vizita ne’e bele haree, la’ós de’it buat ne’ebé mak hosi ita nia kultura, maibé mós atu hatene kestaun bázika liu, mak Timor-Leste nia lokalizasaun. Iha espozisaun ne’e, ita hatudu esensiál liu ita nia kultura materiál. Ita koalia kona-ba ita nia Kolesaun Nasionál, liu-liu estátua sira, ho dimensaun boot no ita tau iha espozisaun iha ita nia pavillaun. Hamosu interese barak hosi parte ema vizitante internasionál sira”.

Parte barak liu hosi interese hirak ne’e tanba faktu ida katak, Timor-Leste mak nu’udar ida hosi nasaun hirak seluk ne’ebé mak foun liu iha mundu. “Iha Loron Nasionál Timor-Leste nian iha Espo 2010 Xangai (ne’ebé mak monu iha loron 13 fulan Jullu) ita organiza atividade oin-oin ne’ebé mak halo ema vizitante barak mai iha ita nia pavillaun. Ita nia dansa, ita nia múzika sira... iha duni ema balun ne’ebé mak mai husu buat ruma mai ha’u kona-ba Timor-Leste. Pergunta komún tebes ida mak: ita mai hosi ne’ebé? Ha’u esplika ba ema barak katak ita mak País ida ba dahuluk hetan  independénsia iha miléniu foun ida ne’e; katak ita iha Sudueste Aziátiku, entre Indonézia no Austrália.”

Partisipasaun Timor-leste nian ba dahuluk  iha eventu ida ho dimensaun hanesan ne’e, ema organizadór sira simu tebes ho laran luak, “Diretór Ajénsia Internasionál espozisaun ne’e rasik fó parabéns mai ita, no ita hetan konvite atu partisipa iha festivál ida seluk ne’ebé mak sei hala’o iha tinan oin mai, iha Xina”, koalia Sekretáriu Estadu Kultura.

Pavillaun Timor-Leste nian, loron-loron hetan nafatin vizita, hosi ema rihun ruanulu to’o rihun tolunulu. Iha loron 31 fulan Outubru, taka espozisaun ho serimónia gala, ne’ebé sei konta ho prezensa hosi na’i ulun boot reprezentante timór-oan sira, hanesan Primeiru-Ministru, Ministru Negósiu Estranjéiru no responsável hirak Pavillaun Timor-Leste nian iha Espo 2010 Xangai, Xina.