Governu Timor-Leste

Ministériu Administrasaun Estatál, liuhosi Sekretáriu Estadu Dezenvolvimentu Lokál, Mateus dos Santos Tallo, lansa ofisialmente Relatóriu “Avaliasaun ba Rekursus no Kapasidade Munisipál”. Serimónia ne’e, hala’o iha edifísiu Komisaun Nasionál Eleisoins (CNE-sigla iha lian portugés) ne’e hetan partisipasaun husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, no mós entidades governamentál oioin no reprezentantes munisipál nian. 

Vise-Primeiru-Ministru, iha abertura eventu ne’e, destaka importánsia hosi relatóriu ida-ne’e ba dezenvolvimentu área rurál sira, tuir planu dezenvolvimentu munisípiu ne’ebé elabora ona, fornese instrumentus atu hadi’a jestaun rekursu lokál sira. Mariano Assanami Sabino salienta mós aspetu esensiál tolu ba jestaun munisípiu ne’ebé di’ak: jestaun kapasidade rekursus umanus, kapasidade rekursu finanseiru no kapasidade planeamentu nian. 

Sekretáriu Estadu Dezenvolvimentu Lokál (SEDL), Mateus dos Santos Tallo, iha nia diskursu, esplika katak dadus sira ne'ebé aprezenta rekolle durante tinan 2024 hosi ninia gabinete nia ekipa. Kompilasaun ba informasaun ida-ne’e ho objetivu atu apoia lider komunitáriu sira iha preparasaun planu dezenvolvimentu komunitáriu, atu nune’e bele promove envolvimentu populasaun nian hodi identifika dezafiu, define meta no implementa estratéjia sira ne’ebé hadi’a kondisaun ekonómika, sosiál no ambientál komunidade sira-nian. 

Relatóriu ne’e kobre área estratéjika lubuk ida, inklui edukasaun, saúde, transporte, produsaun lokál, agrikultura, infraestrutura, turizmu no eletrisidade. Dadus ne’e sei sai hanesan baze hodi define prioridades no planeamentu ida ne’ebé efetivu liu ba intervensaun governu nian, ne’ebé hametin serbisu autoridade munisípiu no lider komunitáriu sira nian. 

Serimónia ne’e marka prezensa husi Sekretáriu Estadu Toponímia no Ordenamentu Urbanu, Germano Santa Brites, Sekretáriu Estadu Florestas, Fernandino Vieira da Costa, Prezidentes Autoridades Munisipais, Administradores Postus Administrativus, Xefe Suku sira, nune’e mós reprezentantes husi ministériu oioin no entidade governamentál sira.