Ministru Turizmu Komérsiu no Indústria atu labele halo manipulasaun ba presu produtu báziku sira nian
![MTCI_Sector Privado_PORTAL](https://timor-leste.gov.tl/wp-content/uploads/2010/10/MTCI_Sector-Privado_PORTAL-300x203.jpg)
Ministru Turizmu Komérsiu no Indústria (MTKI), Gil da Costa Alves husu ba emprezáriu tomak iha rai laran atu labele hanehan povu hoodi halo manipulasaun ba folin sasan bázika iha merkadu.
Ministru Gil Alves hateten, emprezáriu sira tenke hala’o atividade negósiu ho justu, atu nune’e bele fó di’ak liu kontribuisaun ba dezenvolvimentu Timor-Leste.
Nia hatutan, atu dezenvolve ekonomia Timor-Leste ba oin, Emprezáriu sira mós hanesan autór ne’ebé importante tebes. Maibé presiza tebes emprezáriu sira tenke hala’o knar tuir regulamentu Governu nian ne’ebé ho papel fundamental no forte iha atividade negósiu.
“Atu fa’an sasan bazikas ba konsumidores sira iha Timor-Leste Governu presiza Emprezáriu sira ne’ebé hakarak servisu ho justu atu nune’e la bele hanehan konsumidores sira” subliña Ministru Gil Alves wainhira offisialmente loke seremónia ho tema “Haforsa Sektor Privadu ba Dezenvolvementu Ekonomia Timor Leste” ne’ebé hala’o iha Aula Dili Conference Center (Eis Merkado Lama, Dili), Tersa (19/10).
Ministru Gil Alves iha okaziaun ne’e hateten, MTKI liu husi Inspesaun Jerál ba Seguransa Alimentar no Ekonomia, sei kontinua nafatin hala’o kontrola ba atividade komersiál sira atu emprezáriu sira hala’o kna’ar labele hamate konsumidór sira.
Tuir lei, Ministru Gil Alves afirma, Governu sei la tolera emprezáriu sira ne’ebé malandru, la iha lisensa ba negósiu no fa’an sasan ne’ebé liu ona prazu.
Regulamentu ne’ebé Governu iha, Ministru Gil Alves afirma, la’ós atu hanehan ka hamate Emprezáriu sira maibé oinsás Emprezáriu sira tau folin ne’ebé tuir padraun, tanba Governu ho hanoin atu servi no defende konsumidór sira.