Governu Timor-Leste

Delegadu Timor-Leste hamutuk ho Sekretariadu Permanente Forum ba Kooperasaun Ekonómika no Komersiál entre Xina no País Lian Portugeza (Forum Makau), iha loron 24 fulan-janeiru tinan 2025, iha Makau, asina Akordu-Kuadru ida ba Investimentu ho Grupu Caizi husi Xina, hodi promove dezenvolvimentu ekonómiku no komersiál iha país. 

Akordu ne’e prevee implementasaun ba projetu oioin iha setór komérsiu, abitasaun, otelaria, indústria, turizmu, agrikultura no akuakultura, ho investimentu ida ne’ebé besik dolar amerikanu billaun ida. Entre inisiativa sira ne’ebé prevee, destaka liu ba kriasaun Sentru Komersiál Dili-Caizi, ne’ebé sei inklui edifísiu sede empreza, otél ida, sentru konvensaun ida no bairru rezidensiál ida. 

Atu garante implementasaun no efisiénsia husi parseria ne’e, sei estabelese grupu serbisu hamutuk ida hodi halo koordenasaun no promosaun ba investimentu sira. Mekanizmu ida-ne’e sei permite monitorizasaun regulár ba ezekusaun projetu no troka informasaun sira kona-ba progresu kooperasaun. 

Forum Makau ne’e hanesan plataforma intergovernamentál ida ne’ebé harii iha tinan 2003 hosi governu Repúblika Populár Xina, koopera hamutuk ho país lian portugeza sira, ho objetivu atu promove komérsiu, investimentu no kooperasaun ekonómika entre Xina no Estadus-membrus Forum nian.